Mynd: Stocksnap.io
Athugið þessi frétt er meira en 11 mánaða gömul.
Veitingastaðir verða að fylgja reglum um heimsendan mat
Heilbrigðiseftirlit Reykjavíkur hefur komið áríðandi upplýsingum til matvælafyrirtækja vegna þess hvað heimsendingarþjónusta veitingahúsa hefur aukist mikið vegna kórónuveirunnar og samkomubanns.
Í tilkynningu frá heilbrigðiseftirlitinu segir að þessi breytta þjónusta við viðskiptavini kalli á nýjar áskoranir fyrir fyrirtækin. Til að mynda þarf að huga vel að hitastigi og umbúðum en borið hefur á því að matur komi kaldur til viðskiptavina. Heitum mat skal halda við 60°C en kælivörum við 0-4°C. Frystivörur þurfa að vera við -18°C eða lægra. Fyrirtækin verða því að hafa þar til gerðan búnað sem tryggir að hita- eða kælikeðjan rofni ekki þegar veitingarnar fara úr húsi til að draga úr líkum á matarsýkingum.
Einnig hafa borist ábendingar um að veitingar séu heimsendar með einkabílum en slíkt er ekki heimilt. Í einkabifreiðum geta hafa verið dýr, veik börn og jafnvel fólk í sóttkví. Það flokkast því undir almannavarnir að hafa þessa hluti í lagi, segir í tilkynningu eftirlitsins.
„Að lokum er minnt á mikilvægi handþvottar, en það á einnig við um sendla í heimsendingarþjónustu. Nauðsynlegt er að handspritt sé til staðar í öllum flutningstækjum svo sendlar geti sprittað hendur á milli viðskiptavina,“ segir í tilkynningunni.
