42 ára kona lést skömmu eftir útskrift af bráðamóttöku

Mynd með færslu
 Mynd: Eggert Þór Jónsson - RÚV
42 ára gömul kona lést innan við sólarhring eftir að hafa verið útskrifuð af bráðamóttöku Landspítalans í síðustu viku. Skoðað verður hvort álag á spítalanum hafi haft eitthvað með málið að gera. Málið er komið í farveg innan spítalans, samkvæmt upplýsingum þaðan, og stjórnendur spítalans ætla að tilkynna það til embættis Landlæknis.

Landspítalinn vill ekki tjá sig um mál einstakra sjúklinga en samkvæmt heimildum fréttastofu varðar málið 42 ára gamla konu sem lést á föstudaginn, daginn eftir að hún var útskrifuð af bráðamóttöku spítalans.

Samkvæmt upplýsingum fréttastofu var konan flutt með sjúkrabíl á bráðamóttöku á fimmtudaginn í síðustu viku, en talið var að hún hefði fengið blóðsýkingu. Konan var orðin máttvana og átti bæði mjög erfitt með gang og með að hreyfa hendur. Hún var send heim í hjólastól, nokkrum klukkustundum eftir komuna á bráðamóttökuna. Hún lést á heimili sínu morguninn eftir, á föstudagsmorgun.

Álagstoppur gæti hafa haft áhrif

„Við gefum ekki upplýsingar um mál einstakra sjúklinga og getum því ekki staðfest þessa frásögn,“ segir í skriflegu svari spítalans við fyrirspurn fréttastofu.

Í svörum spítalans kemur fram að ekkert sé hægt að segja til um það á þessari stundu, hvort atvikið sem kom upp í síðustu viku hafi eitthvað með álag á spítalanum að gera, vegna kórónuveirufaraldursins.

„Álagið á Bráðamóttöku hefur verið með minna móti frá því að Covid-19 faraldurinn hófst, en auðvitað kann að vera að einhver álagstoppur hafi haft áhrif, en það bíður nánari skoðunar,“ segir í svarinu.

Embætti Landlæknis hafði ekki borist tilkynning um atvikið þegar fréttastofa kannaði málið í morgun.

 

johann's picture
Jóhann Bjarni Kolbeinsson
Fréttastofa RÚV
Síðast:
Þessi þáttur er í hlaðvarpi