Austurland

Hlutabréf í Síldarvinnslunni seldust fyrir 29,7 milljarða í hlutafjárútboði fyrirtækisins sem lauk í gær. Alls skráðu sig 6.500 fjárfestar og einstaklingar fyrir áskrift að hlutabréfum að andvirði um 60 milljarða króna. Það var því ríflega tvöfalt meiri eftirspurn eftir hlutabréfunum en nam endanlegri sölu þeirra.

Grafíski hönnuðurinn Heiðdís Halla Bjarnadóttir er nýlega flutt aftur á æskuslóðir sínar á Egilsstöðum. Þar rekur hún lítið hönnurarstúdíó þar sem hún hannar og selur eigin vörur. Fjöllin eru áberandi í verkum hennar og þau sækja fast á hana. „Og ég er orðin pínu heilaþvegin því að ég horfi svo stíft á fjöllin þegar ég er að keyra, að ég er varla viðræðuhæf,“ segir hún kímin.  

Vatnsverksmiðja rís nú á Borgarfirði eystra. Þar verður lindarvatn sett á flöskur og selt sem munaðarvara. Markmiðið er að búa til 4-8 störf á staðnum.

Færa þarf frystihúsið á Seyðisfirði á öruggan stað vegna hættu á stórri landskriðu. Fulltrúi í heimastjórn Seyðisfjarðar vill að Ofanflóðasjóður taki þátt í kostnaði.

Vegurinn til Mjóafjarðar hefur nú verið opnaður. Íbúar Brekkuþorps komast því leiðar sinnar landleiðina, en þangað hefur ekki verið fært síðan í desember.

Mjófirðingar fagna því að bjóða eigi út eldissvæði í firðinum. Fyrrverandi hreppstjóri telur að laxeldi gæti bjargað byggðinni sem hann segir ekki bara brothætta heldur „margbrotna“. Fjórtán manns bjuggu í firðinum í vetur. Vegagerðin byrjar að opna veginn þangað í dag.

Frystihúsið á Seyðisfirði á sér ekki framtíð á núverandi stað vegna hættu að stórri skriðu úr Strandartindi í sunnanverðum firðinum. Þar bráðnar sífreri í urðarjökli og gæti sett af stað stóra skriðu. Óvissa ríkir um hvort Ofanflóðasjóði er skylt að kosta uppkaup á atvinnuhúsnæði.

Slökkviliðið á Egilsstöðum slökkti í dag eld sem kom upp í baðhúsi við bæinn Egilsstaði í Fljótsdal. Talsverður eldur logaði þegar slökkvilið kom á vettvang en ekki var nein hætta á að hann næði til annarra bygginga.

Seyðfirðingar sem ekki mega búa í húsum sínum vegna skriðuhættu þurfa að sætta sig við að fá markaðsverð fyrir húsin, sem er lágt á Seyðisfirði. Þeir sem eiga hús sem eyðilögðust fá hins vegar mun hærri bætur sem eiga að duga til að byggja sambærileg hús. Þetta ósamræmi er talið óheppilegt og geta falið í sér mismunun.

Um 15 til 20 slökkviliðsmenn hjá Brunavörnum á Austurlandi eru í býsna umfangsmiklu verkefni við Vífilsstaði í Hróarstungu. Þar logar eldur í sinu og skógrækt sem og í nokkrum bílum. UPPFÆRT: Slökkvistarfi lauk á fyrsta tímanum og í spilaranum hér að ofan má sjá myndir frá vettvangi og heyra viðtal Rúnars Snæs Reynissonar við Harald Eðvaldsson slökkviliðsstjóra.

Það voru ekki rafstrengir sem kveiktu í Lagarfljótsbrú í gær eins og talið var heldur logaði í gömlum símastrengjum, þó á slíku sé nánast enginn straumur. Brúin er lítið skemmd eftir brunann en nýlagt brúargólfið hefur spænst upp í vetur og þarf að skipa um stóran hluta þess.

Nokkrar skemmdir urðu á Lagarfljótsbrú í dag þegar rafstrengur undir brúnni ofhitnaði og kveikti í brúargólfinu. Önnur akreinin er lokuð vegna skemmda og er umferð stýrt yfir brúna. Starfsmenn ISAVIA á Egilsstaðaflugvelli skutu báti út á Lagarfljót og slökktu eldinn eftir að vegfarendur höfðu reynt að gera það sjálfir.