Frá upphafi árs...
  • 04 jan 2018

    Menningarviðurkenningar RÚV veittar

    Menningarviðurkenningar RÚV fyrir árið 2017 voru veittar. Guðni Th. Jóhannesson, forseti Íslands, Lilja Dögg Alfreðsdóttir mennta- og menningarmálaráðherra og fleiri góðir gestir voru við athöfnina sem útvarpað var á Rás 1. Hallgrímur Helgason hlaut viðurkenningu Rithöfundasjóðs Ríkisútvarpsins fyrir ritstörf. Hljómsveitin Mammút hlaut Krókinn 2017 - viðurkenningu Rásar 2, fyrir framúrskarandi flutning á árinu. Epalhommi var þá valið orð ársins 2017. Alls voru 92 styrkir veittir úr sameinuðum Tónskáldasjóði Ríkisútvarpsins og STEFs árið 2017, en sjóðurinn hefur það markmið að stuðla að frumsköpun og útbreiðslu íslenskrar tónlistar. http://www.ruv.is/i-umraedunni/menningarvidurkenningar-ruv-veittar-vid-hatidlega-athofn

  • 23 jan 2018

    Ragnhildur Steinunn ráðin aðstoðardagskrárstjóri

    Ragnhildur Steinunn Jónsdottir var ráðin aðstoðardagskrárstjóri sjónvarps samkvæmt nýju skipuriti RÚV. Ragnhildur Steinunn vinnur við hlið Skarphéðins Guðmundssonar dagskrárstjóra og dagskrárdeildar að dagskrártengdum málum Sjónvarps. Þá kemur hún að ytri og innri samskiptum dagskrárdeildar sjónvarps og er alhliða stuðningur við dagskrárstjóra meðfram því að sinna áfram dagskrárgerð fyrir sjónvarp. http://www.ruv.is/i-umraedunni/ragnhildur-steinunn-verdur-adstodardagskrarstjori

  • 09 feb 2018

    Nýr RÚV spilari í opnar prófanir

    Mikilvægur prófsteinn í þróun nýs spilara RÚV náðist með því að setja hann í opnar prófanir í febrúar. Með nýjum spilara er verið að svara þörfum nútímans um hraða og örugga miðlun efnis auk þess sem færi gefst á að miðla meira efni en áður. http://www.ruv.is/i-umraedunni/nyr-ruv-spilari-i-opnum-profunum

  • 12 feb 2018

    Leiðin á EM verðlaunuð af KSÍ

    Íþróttadeild RÚV hlaut fjölmiðlaviðurkenningu KSÍ fyrir árið 2017 fyrir heimildarþættina „Leiðin á EM“ sem voru í umsjón Eddu Sifjar Pálsdóttur og Maríu Bjarkar Guðmundsdóttur. „Leiðin á EM“ var gerð í undirbúningnum fyrir EM kvenna í Hollandi. http://www.ruv.is/frett/leidin-a-em-faer-fjolmidlavidurkenningu-ksi

  • 12 feb 2018

    Sjónvarpsefni framleitt eða sýnt á RÚV með 25 tilnefningar

    Tilkynnt var um tilnefningar til Edduverðlaunanna. RÚV hlaut, sem framleiðandi eða meðframleiðandi, 25 tilnefningar fyrir sjónvarpsefni, auk þess eiga dagskrárgerðarmenn RÚV 4 af 5 tilnefningum í flokknum sjónvarpsmaður ársins, þau Guðrún Sóley Gestsdóttir, Sigríður Halldórsdóttir, Sigyn Blöndal og Unnsteinn Manúel Stefánsson. http://www.ruv.is/i-umraedunni/eddan-2018-sjonvarpsefni-framleitt-eda-synt-a-ruv-hlytur-alls-25-tilnefningar

  • 19 feb 2018

    Jafnt kynjahlutfall í dagskrá RÚV

    Í lok árs 2015 voru teknar upp markvissar mælingar á hlutfalli karla og kvenna í hópi viðmælenda í föstum þáttum og fréttum. Nýtt verklag var innleitt, aðgengilegt skráningarkerfi var forritað og starfsmenn þjálfaðir. Hlutfall kynjanna í dagskrá RÚV, utan frétta, árið 2017 var 3% jafnara en árið á undan og nánast jöfn, eða 51% karlar og 49% konur. Séu fréttatímar og fréttatengdir þættir eingöngu teknir saman er hlutfall kynjanna 64% karlar og 36% konur, sem skýrist af hærra hlutfalli karla í leiðandi stöðum í stjórnmálum og samfélaginu sem fluttar eru fréttir af. http://www.ruv.is/i-umraedunni/jafnt-kynjahlutfall-i-dagskra-ruv

  • 22 feb 2018

    Þættir um kvótakerfið verðlaunaðir á Berlinale

    Handrit að þáttaröð Vesturports, Verbúð eða Black Port, sem fjallar um afleiðingar kvótakerfisins fyrir lítið þorp á Íslandi, var í gær valið það áhugaverðasta á CoPro Series samframleiðslumarkaðnum á Berlinale-kvikmyndahátíðinni í Þýskalandi. RÚV er meðframleiðandi Verbúðar og hefur tekið þátt í að þróa og fjármagna verkefnið með Vesturporti. http://www.ruv.is/i-umraedunni/thaettir-um-kvotakerfid-verdlaunadir-a-berlinale

  • 24 feb 2018

    Prufur fyrir dagskrárgerðarfólk framtíðarinnar

    Laugardaginn 24. febrúar opnaði RÚV dyr sínar fyrir fólki á aldrinum 18-30 ára sem hefur brennandi áhuga á dagskrárgerð. Haldnar voru prufur í hljóð- og myndveri fyrir framleiðslu þátta fyrir ungt fólk. Haldnar voru prufur á Norðurlandi á RÚV á Akureyri þann 5. mars. http://www.ruv.is/i-umraedunni/ruv-heldur-prufur-fyrir-dagskrargerdarfolk-framtidarinnar

  • 26 feb 2018

    Fangar hlutu 10 Edduverðlaun

    Sjónvarpsefni framleitt eða sýnt á RÚV var sigursælt á Edduverðlaunahátíðinni. Alls hlaut þáttaröðin Fangar 10 verðlaun. Þá var Kveikur valinn frétta- og viðtalsþáttur ársins, Framapot menningarþáttur ársins og Áramótaskaupið 2017 skemmtiþáttur ársins. http://www.ruv.is/frett/fangar-fengu-tiu-edduverdlaun

  • 28 feb 2018

    Sindri Bergmann tilnefndur til stjórnendaverðlauna

    Sindri Bergmann Þórarinsson, KrakkaRÚVstjóri, var tilnefndur til stjórnunarverðlauna Stjórnvísi 2018. Sindri kom til starfa hjá RÚV árið 2015. Verkefni hans var að efla þjónustu RÚV við börn með áherslu á íslenskt gæðaefni. http://www.ruv.is/i-umraedunni/krakkaruvstjori-tilefndur-til-stjornunarverdlauna

  • 06 mar 2018

    RÚV hlaut tvenn blaðamannaverðlaun

    Alma Ómarsdóttir fréttamaður á RÚV hlaut Blaðamannaverðlaun ársins 2017 fyrir rannsóknarblaðamennsku fyrir upplýsandi umfjöllun sína um uppreist æru. Viktoría Hermannsdóttir, dagskrárgerðarmaður á RÚV, hlaut verðlaun fyrir viðtal ársins. Hún talaði við Árna Jón Árnason í þættinum Á ég bróður á Íslandi? http://www.ruv.is/i-umraedunni/ruv-hlaut-tvenn-bladamannaverdlaun

  • 06 mar 2018

    Auglýst eftir starfsmanni til að sinna þjónustu á öðrum málum en íslensku

    Í samræmi við stefnu RÚV til 2021 um að efla þjónustu við landsmenn með annað móðurmál en íslensku auglýsti RÚV eftir verkefnastjóra í fullt starf. Markmiðið er að þjónusta RÚV endurspegli íslenskt samfélag sem best. Starfsmaðurinn á að leiða þjónustuna þvert á miðla og hafa umsjón með miðlun efnis á ensku á sérstökum vef og auknu aðgengi að efni í dagskrá RÚV sem gæti höfðað til þessa hóps. http://www.ruv.is/i-umraedunni/ruv-auglysir-eftir-starfsmanni-til-ad-sinna-thjonustu-a-odrum-malum-en-islensku

  • 12 mar 2018

    Útvarpsstjórar í Norður-Evrópu funduðu á Íslandi

    Tafelspitz, árlegur fundur útvarpsstjóra Norður-Evrópu, var haldin hér á landi 8.-9. mars. Fundinn sóttu útvarpsstjórar, stjórnendur og fulltrúar DR, YLE, NRK, SVT, SR, UR, BBC, ZDF, ORF, SRG/SSR og ARD. http://www.ruv.is/i-umraedunni/utvarpsstjorar-i-nordur-evropu-funda-a-islandi

  • 26 mar 2018

    Jákvæð rekstrarafkoma eins og síðustu ár

    Helstu niðurstöður ársuppgjörs RÚV eru þær að regluleg starfsemi RÚV er áfram hallalaus og skilar rekstrarafgangi upp á 201 milljón króna. http://www.ruv.is/i-umraedunni/ruv-skilar-jakvaedri-rekstrarafkomu-2017-eins-og-sidustu-ar

  • 26 mar 2018

    Vönduð páskadagskrá RÚV

    Páskadagskrá RÚV var vönduð og fjölbreytt. Nýtt íslenskt efni var í öndvegi. http://www.ruv.is/i-umraedunni/paskadagskra-2018

  • 01 apr 2018

    Mannasiðir frumsýndir

    Mannasiðir, ný íslensk sjónvarpsmynd í tveimur hlutum, voru frumsýndir á RÚV um páskana. Fyrri hlutinn á páskadag, sunnudaginn 1. apríl og sá síðari annan í páskum. http://www.ruv.is/i-umraedunni/mannasidir-ny-islensk-sjonvarpsmynd-frumsynd-a-ruv-um-paskana

  • 05 apr 2018

    Djók í Reykjavík hefur göngu sína

    Dóri DNA skyggnist inn í líf helstu grínista Íslands í nýrri sex þátta seríu. Hann spjallaði við þá um grín frá öllum hliðum og spurði ýmissa spurninga. Eru einhverjar reglur í gríni? Má gera grín að öllu? Er hægt að lifa á gríninu einu saman? http://www.ruv.is/i-umraedunni/djok-i-reykjavik-ny-islensk-heimildathattarod-um-grin-hefur-gongu-sina

  • 13 apr 2018

    RÚV stóð fyrir borgarafundi um menntamál í beinni.

    RÚV stóð fyrir borgarafundi í beinni útsendingu um menntamál. Fundurinn bar yfirskriftina: Er menntakerfið í molum? Meðal þeirra sem sátu fyrir svörum voru Lilja Alfreðsdóttir, menntamálaráðherra, Ragnar Þór Pétursson, formaður Kennarasambandsins og Skúli Helgason, formaður Skóla- og frístundasviðs Reykjavíkurborgar. http://www.ruv.is/i-umraedunni/borgarafundur-er-menntakerfid-i-molum

  • 15 apr 2018

    RÚV með um 15% auglýsingamarkaði

    Hagstofan birti skýrslu sína um tekjur fjölmiðla árið 2016. Þar kom margt áhugavert fram. Þar á meðal að hlutdeild RÚV í heildarauglýsingatekjum íslenskra fjölmiðla er 15% en það er umtalsvert lægra en stundum hefur verið haldið fram í opinberri umræðu. http://www.ruv.is/i-umraedunni/ruv-med-15-af-islenskum-auglysingamarkadi

  • 20 apr 2018

    Norrænt samstarf um framleiðslu leikins efnis kynnt

    Útvarpsstjórar norrænu almannaþjónustumiðlanna fimm hafa kynnt „Nordic12“ sem er nýtt samstarf um framleiðslu leikins efnis. Vegna samningsins um norrænt leikið efni, sem var kynntur í tónleikahúsi DR, geta notendur nálgast tólf nýjar leiknar þáttaraðir framleiddar af sjónvarpsstöðvum í almannaþjónustu, þær verða einnig aðgengilegar notendum mun lengur en áður. http://www.ruv.is/i-umraedunni/norraent-samstarf-um-framleidslu-leikins-efnis-veitir-ahorfendum-adgang-ad-tolf-nyjum

  • 22 apr 2018

    Sögur – verðlaunahátíð barnanna í fyrsta sinn

    Verðlaunahátíðin Sögur var haldin í fyrsta sinn sunnudagskvöldið 22. apríl og var send út beint á RÚV. Hátíðin var í Eldborgarsal Hörpu og var öll hin glæsilegasta. Um 2.000 börn á aldrinum 6-12 ára kusu það besta á sviði tónlistar, bókmennta, sjónvarps og leikhúss, auk þess sem skapandi börn voru verðlaunuð. KrakkaRÚV var einn samstarfsaðila hátíðarinna í samvinu við Sögur– samtök um barnamenningu. http://www.ruv.is/i-umraedunni/vel-heppnud-fyrsta-verdlaunahatid-barnanna

  • 26 apr 2018

    RÚV opnar fyrir sjálfstæðum framleiðendum

    Í nýrri stefnu RÚV sem kynnt var á vordögum 2017 og unnin með aðkomu á annað þúsund landsmanna og hagaðila víða að úr samfélaginu, er dregið upp hvernig þjónusta RÚV þróast á næstu árum í takt við þarfir nútímafólks. Sérhæfð sjónvarps- og kvikmyndaver, hljóðver og önnur tækniaðstaða hefur nú verið gerð aðgengileg til leigu fyrir sjálfstæða framleiðendur sjónvarps- og kvikmyndaefnis, hvort sem það er framleiðsla fyrir RÚV eða aðra. http://www.ruv.is/i-umraedunni/opid-efstaleiti-utleiga-a-adstodum-og-taekjum-til-sjalfstaedrar-framleidslu

  • 08 maí 2018

    Ari komst ekki áfram – Ísrael sigraði Eurovision

    Ari Ólafsson var ekki meðal þeirra tíu sem komust upp úr fyrri undanúrslitum Eurovision. Þetta er fjórða skiptið í röð sem Ísland kemst ekki í úrslitin. Síðast komust Íslendingar áfram 2014 þegar Pollapönk komst í úrslit þar sem sveitin hafnaði í 15. sæti. http://www.ruv.is/frett/ari-komst-ekki-afram

  • 09 maí 2018

    Kosningavefur RÚV opnaður

    Nýr kosningavefur RÚV var opnaður. Þar var hægt að nálgast upplýsingar um alla framboðslista, fylgiskannanir í aðdraganda kosninga og kosningaprófið, og þar með finna sinn frambjóðanda. Hátt í 200 listar buðu fram í sveitarfélögunum 72. Kosningaritstjórn RÚV safnaði saman upplýsingum um þá alla og birti á kosningavefnum ásamt ýmsu fleiru. http://www.ruv.is/frett/nyr-kosningavefur-ruv-farinn-i-loftid

  • 15 maí 2018

    Sævar hlýtur Vorvindaviðurkenningu IBBY

    Sævar Helgi Bragason umsjónarmaður Krakkafrétta hlaut á dögunum viðurkenningu Vorvinda fyrir að miðla fróðleik til barna- og unglinga af mikilli eljusemi, ástríðu og fórnfýsi. Sævar Helgi hóf störf fyrir KrakkaRÚV haustið 2017 og er umsjónarmaður Krakkafrétta. Hann er einnig með vikulegan útvarpsþátt í Útvarpi KrakkaRÚV á Rás 1 þar sem hann fjallar um ýmislegt en þó mestmegnis um vísindi. http://www.ruv.is/i-umraedunni/saevar-helgi-hlytur-vorvindavidurkenningu-ibby

  • 17 maí 2018

    Hugmyndadagar haldnir í annað sinn

    Hugmyndadagar heppnuðust afar vel þegar þeir voru haldnir í fyrsta sinn haustið 2017 og var því ákveðið að hefja samtalið við þjóðina á ný. Dagana 15.-17. maí tókum við á móti þeim hópum og einstaklingum sem valdir voru til að kynna sínar hugmyndir fyrir dagskrárstjórum. Að þessu sinni bárust um 160 hugmyndir úr öllum áttum, frá atvinnu- og áhugamönnum og tæplega 70 þeirra hlutu áheyrn dagskrárstjóra RÚV, Rásar 1 og 2, KrakkaRÚV og RÚV núll. http://www.ruv.is/i-umraedunni/vel-heppnadir-hugmyndadagar

  • 18 maí 2018

    Páll hlaut aðalverðlaun á Alþjóða tónaskáldaþinginu

    Tónskáldið Páll Ragnar Pálsson hlaut aðalverðlaunin á Alþjóða tónskáldaþinginu, International Rostrum of Composers, í Búdapest 15.-19. maí, fyrir tónverkið Quake. Verk eftir tónskáldin Pál Ragnar Pálsson og Hildi Guðnadóttur voru tilnefnd af Ríkisútvarpinu til að taka þátt í Alþjóðlega tónskáldaþinginu. http://www.ruv.is/frett/pall-hlytur-adalverdlaun-a-tonskaldathinginu

  • 18 maí 2018

    RÚV núll – þjónusta við ungt fólk sett á laggirnar

    RÚV núll tók til starfa, ný þjónusta fyrir 15-29 ára þar sem ungt dagskrárgerðarfólk er í aðalhlutverki. Almannaþjónusta á að ná til allra aldurshópa og RÚV er meðvitað um að þarfir og kröfur yngri kynslóða breytast ört. Í stefnu RÚV til 2021 var sérstaklega tekið fram að mikilvægt sé að þróa stafræna miðla til að bæta þjónustuna í breyttum heimi. http://www.ruv.is/i-umraedunni/ruv-null-er-ny-thjonusta-fyrir-15-29-ara

  • 06 jún 2018

    Fákafen hlaut Grímuverðlaunin

    Uppfærsla Útvarpsleikhússins á leikritinu Fákafen eftir Kristínu Eiríksdóttur hlaut Grímuverðlaunin í flokki Útvarpsverka á Grímuhátíðinni. Kolfinna Nikulásdóttir leikstýrði verkinu. http://www.ruv.is/i-umraedunni/fakafen-valid-utvarpsverk-arsins-a-grimunni

  • 12 jún 2018

    Mesta hlustun á Rás 1 frá upphafi mælinga

    Hlustun á Rás 1 mældist nýverið sú mesta í einum mánuði frá því að rafrænar mælingar hófust fyrir 10 árum. Hlustunin á Rás 1 hefur verið að aukast jafnt og þétt síðustu þrjú ár og var hlutdeild rásarinnar 25,8% af heildarhlustun landsmanna í maímánuði. http://www.ruv.is/i-umraedunni/mesta-hlustun-a-ras-1-fra-upphafi-maelinga

  • 15 jún 2018

    Yfirburðartraust til fréttastofu RÚV

    Yfirburðatraust landsmanna til fréttastofu RÚV var enn og aftur staðfest í nýrri könnun MMR sem gerð var í maí. Alls báru 70% aðspurðra mikið traust til fréttastofu RÚV en traustið mældist að meðaltali 67,5% í könnunum MMR fyrir RÚV 2017. Aðrir miðlar standa RÚV langt að baki. http://www.ruv.is/i-umraedunni/yfirburdatraust-til-frettastofu-ruv

  • 18 jún 2018

    Metáhorf á leik Íslands og Argentínu á HM

    Áhorfið á leik Íslands og Argentínu, 63% meðaláhorf, er það mesta sem mælst hefur á íþróttaviðburð. Eldra metið var 58,8% áhorf á leik Íslands og Englands á EM í fótbolta 2016 en sá leikur var sýndur í beinni samtímis á RÚV og í Sjónvarpi Símans. Hlutdeild RÚV á meðan á leik stóð var 99.6% - sem í stuttu máli sýnir að nánast ALLIR sem voru á annað borð með kveikt á sjónvarpi á þessum tíma voru að horfa á leikinn. http://www.ruv.is/i-umraedunni/metahorf-a-leik-islands-og-argentinu-a-hm-2018

  • 19 jún 2018

    Viðhorf til RÚV ekki jákvæðara í 12 ár

    Ný viðhorfskönnun Gallups sem gerð var í maí sýnir að jákvæðni þjóðarinnar gagnvart RÚV og þjónustu þess hefur ekki verið meiri frá árinu 2006. Rúmlega 74% aðspurðra eru mjög eða frekar jákvæð gagnvart Ríkisútvarpinu sem er betri niðurstaða en á sama tíma í fyrra. Um 17% svara „hvorki né“ og 9% eru mjög eða frekar neikvæðir gagnvart RÚV, sem hafa ekki verið færri frá upphafi mælinga. http://www.ruv.is/i-umraedunni/jakvaett-vidhorf-til-ruv-ekki-verid-meira-i-12-ar

  • 26 júl 2018

    Metáhorf á Heimsmeistaramótið í knattspyrnu

    Áhorf á Heismeistaramótið í knattspyrnu á RÚV var með allra mesta móti. 94,5 landsmanna horfðu eitthvað á mótið og skipting milli kynja var nánast jöfn. Af heildaráhorfi á keppnina voru konur um 47% áhorfenda. http://www.ruv.is/i-umraedunni/hm-2018-metahorf

  • 22 ágú 2018

    Tónaflóð, stórtónleikar Rásar 2 á Menningarnótt.

    Stórtónleikar Rásar 2, Tónaflóð, fóru fram í 21. sinn við Arnarhól á Menningarnótt í blíðskaparveðri. RÚV núll hóf leik og komu fram á dagskrá á þeirra vegum mikið af frambærilegasta unga tónlistafólki landsins. Söngkonurnar GDRN og Bríet, Herra Hnetusmjör og Huginn, Flóni, Birnir og tvíeykið Jói Pé og Króli. Að því loknu tók Rás 2 við dagskránni og fyrst á svið var samstarfsverkefni Prins Póló og Hjálma. Þá tóku við Írafár sem fögnuðu 20 ára afmæli sínu og stórhljómsveitin Todmobile var svo síðust á svið. http://www.ruv.is/i-umraedunni/tonaflod-stortonleikar-a-menningarnott-i-21-sinn

  • 31 ágú 2018

    Klassíkin okkar í þriðja sinn

    Klassíkin okkar var send út beint í þriðja sinn föstudagskvöldið 31. ágúst. Tónleikarnir hafa markað upphaf menningarvetursins á RÚV undanfarin ár. Að þessu sinni var þemað Uppáhalds íslenskt og tóku RÚV og Sinfóníuhljómsveit Íslands saman höndum og leyfðu landsmönnum að velja efnisskrána á þessum fyrstu tónleikum sveitarinnar á starfsárinu. Það lag sem reyndist efst í kosningu þjóðarinnar á RÚV.is var lagið Heyr himna smiður eftir Þorkel Sigurbjörnsson við sálm Kolbeins Tumasonar. http://www.ruv.is/i-umraedunni/klassikin-okkar-i-thridja-sinn

  • 07 sep 2018

    Þrír þættir Rásar 1 tilnefndir til Prix Europa

    Tilnefningar til Prix Europa-ljósvakaverðlaunanna voru kunngjörðar í vikunni og eru þrír íslenskir útvarpsþættir úr dagskrá Rásar 1 tilnefndir að þessu sinni. Upptaka útvarpsleikhússins á Mannasiðum var tilnefnd í flokknum besta útvarpsleikritið, Á ég bróður á Íslandi? var tilnefnd í flokknum besti heimildarþáttur í útvarpi, og R1918 fékk tilnefningu í flokknum stafræn miðlun. http://www.ruv.is/i-umraedunni/thrir-dagskrarlidir-a-ras-1-tilnefndir-til-prix-europa

  • 13 sep 2018

    Þátttaka RÚV í Ísrael staðfest

    RÚV tók ákvörðun að taka enn á ný þátt í Söngvakeppni evrópskra sjónvarpsstöðva, Eurovision, sem verður næst haldin í borginni Tel Aviv í Ísrael í maí 2019. Hvatning hafði borist stofnuninni um að sniðganga keppnina að þessu sinni vegna ástandsins á Gaza og átaka milli Ísraela og Palestínumanna. RÚV fór vandlega yfir málið og ákvað að ganga í takt við aðra almannaþjónustumiðla á Norðurlöndum. Vó þar þyngst að ekki er um pólitískan viðburð að ræða, heldur samkomu ólíkra þjóða sem allt frá stofnun hefur haft að megintilgangi og leiðarljósi að breiða út boðskap sameiningar- og friðar. http://www.ruv.is/i-umraedunni/thatttaka-i-eurovision-2019-i-tel-aviv

  • 21 sep 2018

    Nýtt fréttamyndver tekið í notkun

    Nýtt fréttamyndver var tekið í notkun þegar kvöldfréttir voru í fyrsta sinn sendar þaðan út. Myndverið gjörbreytir aðstöðu fréttastofunnar. Sérhæft, sjálfstætt myndver gefur fréttastofunni færi á snarpari viðbrögðum, eykur hagkvæmni í rekstri og möguleika í framleiðslu. http://www.ruv.is/i-umraedunni/nytt-frettamyndver-ruv

  • 16 okt 2018

    Höfundar áramótaskaupsins opinberaðir

    Höfundar Áramótaskaupsins 2018 voru þau Ilmur Kristjánsdóttir, Jón Gnarr, Katla Margrét Þorgeirsdóttir, Katrín Halldóra Sigurðardóttir, Sveppi og Arnór Pálmi Arnarson sem einnig leikstýrði, annað árið í röð. http://www.ruv.is/i-umraedunni/hofundar-aramotaskaupsins-opinberadir

  • 01 nóv 2018

    Málþing RÚV – Næst á dagskrá

    Börn, ungt fólk og miðlun til framtíðar var í brennidepli á fjölmennu málþingi RÚV, Næst á dagskrá, sem haldið var í aðalmyndveri RÚV í byrjun nóvember. Fjallað var um lífsstíl og miðlanotkun yngri kynslóða, stefnu og þjónustu RÚV auk þess sem framúrskarandi erlendir gestir miðluðu af reynslu sinni. http://www.ruv.is/i-umraedunni/naest-a-dagskra

  • 03 nóv 2018

    Með gat í hjartanu í laginu eins og Guð

    Glænýtt íslenskt heimildaverk eftir Jón Atla Jónasson í leikstjórn Egils Heiðars Antons Pálssonar var flutt á Rás 1. Fjallað um var atburði sem farið höfðu leynt innan kaþólsku kirkjunnar á Íslandi. Verkið var unnið í samstarfi við Borgarleikhúsið og var tekið upp með áhorfendum á Nýja sviði Borgarleikhússins. http://www.ruv.is/i-umraedunni/med-gat-a-hjartanu-i-laginu-eins-og-gud

  • 18 nóv 2018

    Flateyjargátan frumsýnd

    Flateyjargátan er ný, íslensk spennuþáttaröð í fjórum hlutum sem frumsýnd var á RÚV sunnudaginn 18. nóvember. Árið 1971 snýr Jóhanna aftur til Íslands, eftir 10 ára dvöl í París, til að jarða föður sinn sem helgað hafði líf sitt rannsóknum á hinni óleystu Flateyjargátu. Flateyjargátan var framleidd af Reykjavik Films og Sagafilm í samstarfi við RÚV. http://www.ruv.is/i-umraedunni/flateyjargatan-ny-islensk-spennuthattarod-hefst-sunnudaginn-18-november-a-ruv

  • 07 des 2018

    Aðventugleði Rásar 2

    Rás 2 bauð landsmönnum til aðventugleði föstudaginn 7. desember. Þétt jóladagskrá var í loftinu frá klukkan 9 til 16, þar sem fjöldi landsþekktra tónlistarmanna kom við og tók lagið í beinni útsendingu á Rás 2 og í hljóði og mynd á RÚV.is. http://www.ruv.is/i-umraedunni/adventugledi-rasar-2-fostudaginn-7-desember

  • 23 des 2018

    Vegleg hátíðardagskrá í öllum miðlum

    Boðið var upp á veglega dagskrá á öllum miðlum RÚV yfir hátíðarnar. Lögð var sérstök áhersla á vandað og skemmtilegt dagskrárefni fyrir alla fjölskylduna, framúrskarandi erlendar kvikmyndir og metnaðarfullt menningarefni. http://www.ruv.is/i-umraedunni/hatidardagskra-rikisutvarpsins-yfir-jol-og-aramot

  • 26 des 2018

    Ófærð II frumsýnd

    Önnur þáttaröð Ófærðar hóf göngu sína á RÚV annan í jólum. Íslendingar fengu fyrstir allra að berja nýju þættina augum en þeir fóru ekki í sýningu í öðrum löndum fyrr en eftir áramót. Þættirnir, sem eru tíu talsins, voru sýndir á sunnudagskvöldum fram í febrúar. http://www.ruv.is/i-umraedunni/ofaerd-ii-frumsynd-a-annan-i-jolum

  • 31 des 2018

    Bára Halldórsdóttir, manneskja ársins á Rás 2

    Hlustendur Rásar 2 völdu Báru Halldórsdóttur manneskju ársins. Bára tók upp samtal sex þingmanna á barnum Klaustri 20. nóvember 2018. Tilkynnt var um niðurstöðu kosningar á manneskju ársins í þættinum Á síðustu stundu á Rás 2 á gamlársdag. http://www.ruv.is/i-umraedunni/bara-halldorsdottir-manneskja-arsins-a-ras-2

Sækja meira