Skipum með kvóta 42% færri

asrunbi — Thu, 09 Sep 2010 07:54:09 +0000

Skipum með kvóta hefur fækkað um ríflega 40% á fimm árum. Í Fiskifréttum í dag kemur fram að 1. september árið 2005 hafi 1111 skip og bátar fengið úthlutað kvóta samanborið við 644 í ár. Á þessum fimm árum hafi skutttogurum fækkað úr 66 í 59, skipum með aflamark úr 197 í 123 og krókaaflamarksbátum fækkað úr626 í 367. Þá hafi smábátum með aflamark fækkað úr 222 í 98 á fimm árum.

Fiskifréttir telja nokkrar skýringar vera á þessari þróun. Við afnám sóknardagakerfisins hafi dagabátarnir flust yfir í krókaaflamarkið. Margir þeirra hafi verið með litlar veiðiheimildir og eigendurnir séð sér hag í því að selja kvótann og hætta útgerð. Þá hafi mikil skerðing þorskaflaheimilda síðustu ár gert útgerðum af öllum stærðum erfitt fyrir og flýtt fyrir sameiningu aflaheimilda. Jafnframt hafi hátt verð á varanlegum kvóta einnig stuðlað að þessari þróun.

Málaflokkar:

Innlendar fréttir

Sjávarútvegsmál

Neita að borga hærra auðlindagjald

berglinde — Wed, 08 Sep 2010 20:55:54 +0000

Sjávarútvegsmenn segja ekki koma til greina að þeir greiði hærra verð fyrir afnot af auðlindinni, þrátt fyrir að samningaleið um úthlutun kvótaheimilda verði farin.

Meirihluti sáttanefndar um fiskveiðistjórnunarkerfið leggur til að áfram verði stuðst við aflamarkskerfið og svokölluð samningsleið verði farin við úthlutun veiðiheimilda. Í henni felst að kvótaheimildir eru innkallaðar og svo gengið til samninga við núverandi rétthafa veiðiheimildanna um afnotarétt til tíu til tuttugu ára. Útvegsmenn segja ekki koma til greina að þeir greiði hærra verð fyrir afnot af auðlindinni, en núgildandi veiðigjald geri ráð fyrir en það skilar þjóðarbúinu tæpum þremur milljörðum króna á fiskveiðiárinu.Friðrik J. Arngrímsson, framkvæmdastjóri LÍÚ, segir það markmið útgerðarmanna að greiða sem mest til ríkisins fyrir afnot af auðlindinni. Það sé gert í formi rekstrar á sjálfbærum og arðbærum sjávarútvegi, að fá sem mest fyrri vöruna og að gera þetta með sem minnstum tilkostnaði. Þannig fái ríkið mest út úr þessu. Nú séu þeir með veiðigjald þar sem þeir greiða 9,5% af aflaverðmætinu og þeir sjái ekki ástæðu til að það gjald verði hækkað. Sjávarútvegsráðherra vildi ekki veita viðtal vegna málsins í dag. Ólína Þorvarðardóttir, varaformaður sjávarútvegsmanna sakar útvegsmenn um skort á samningsvilja og ekki verði unað við óbreytt auðlindagjald. Hún segir útgerðina taka úr sjó aflaverðmæti upp á annað hundrað milljarða króna sé tekið mið af síðasta ári, og því segi það sig sjálft að núverandi auðlindagjald sé ekki að skila neinum arði í þjóðarbúið.

Málaflokkar:

Innlendar fréttir

Sjávarútvegsmál

Stjórnmál

Skiptar skoðanir um samningaleið

asrunbi — Wed, 08 Sep 2010 12:37:31 +0000

Friðrik J. Arngrímsson, framkvæmdastjóri LÍÚ, telur að þjóðin geti fellt sig við tillögu sáttanefndar um stjórn fiskveiða, að gengið verði til samninga við rétthafa kvótaheimilda. Útvegsmenn leggist hins vegar gegn því að greiða hærra verð fyrir afnot af auðlindinni. Ólína Þorvarðardóttir, varaformaður sjávarútvegsnefndar segir tillögur sáttanefndarinnar óljósar og ekki til þess fallnar að skapa sátt.

Sáttanefnd um endurskoðun laga um stjórn fiskveiða kynnti tillögur sínar í gær. Þar er lagt til að áfram verði byggt á aflamarkskerfi og svokölluð samningaleið verði farin, þannig að ríkið og rétthafar aflaheimilda semji um langtíma afnotarétt með skýrum ákvæðum um framlengingu samninga. Friðrik J. Arngrímsson, framkvæmdastjóri LÍÚ, segir að breið samstaða hafi myndast í nefndinni um tillögurnar. Hann segir útvegsmenn hins vegar leggjast gegn því að þeir greiði meira fyrir afnot af auðlindinni en nú er, en útgerðin greiðir tæpa þrjá milljarða króna í sérstakt veiðigjald á fiskveiðiárinu.Friðrki segir LÍU hafa lagt framúttektir á því hvernig ríkið fái mest út úr nýtingu þessara auðlinda. Það sé ekki með því að rífa meiri fjármuni beint út úr fyrirtækjunum heldur að láta þá vaxa og dafna þar, enda hafi ríkið af því skatttekjur. Ríkið fái meira þannig en ekki minna. Friðrik telur að sátt geti skapast á meðal þjóðarinnar um niðurstöður sáttanefndarinnar. Hann segir að besta fyrirkomulagið sé í núverandi fiskveiðistjórnunarkerfi. Á því eigi að byggja eins og sé skýr niðurstaða sáttanefndarinnar svokölluðu. Ólína Þorvarðardóttir, fulltrúi Samfylkingar í sjávarútvegsnefnd, þar sem hún er varaformaður, segir ýmislegt óútfært í tillögum nefndarinnar og þær séu ekki fallnar til þess að skapa sátt um breytingar á fiskveiðistjórnunarkerfinu.Ekki sé nóg að hagsmunaaðilar komi sér saman um breytingarnar. Verklok nefndarinnar séu áfangi, og nú þurfi stjórnvöld að sýna kjark og gera þær breytingar á fiskveiðistjórnunarkerfinu sem kveðið er á um í stjórnarsáttmálanum. Ólína segir að útgerðin borgi bara málamyndagjald fyrir afnot af auðlindinni. Gjaldið sé hlægilega lágt. „Ef menn eru að tala á þessum nótum þá eru þeir ekki í neinum sátta- eða samráðshugleiðingum við stjórnvöld,“ segir Ólína.

Málaflokkar:

Innlendar fréttir

Sjávarútvegsmál

Stjórnmál

ESB óskar eftir fundi um makríl

asrunbi — Wed, 08 Sep 2010 11:03:01 +0000

Evrópusambandið hefur óskað eftir tvíhliða fundi með Íslendingum vegna makrílveiða þeirra. Íslendingar hafa samþykkt þá ósk og verður fundað í Reykjavík 21. og 22.september.

Að sögn Tómasar H. Heiðar, formanns samninganefndar Íslands í makrílveiðum, er þessi fundur aðeins hluti af óformlegum þreifingum sem munu eiga sér stað fyrir stóra samningafundinn í deilunni sem haldinn verður um miðjan október. Á þann fund mæta fulltrúar allra fjögurra strandríkjanna, þ.e. Íslands, Færeyja, Noregs og Evrópusambandsins.

Málaflokkar:

Innlendar fréttir

Sjávarútvegsmál

Evrópusambandið

Áframhaldandi skuldsetning

berglinde — Tue, 07 Sep 2010 20:19:19 +0000

Sáttanefnd um fiskveiðistjórnunarkerfið leggur til að samið verði við núverandi kvótaeigendur og þeir greiði gjald fyrir afnot af auðlindinni. Fulltrúi Borgarahreyfingarinnar segir tillöguna leiða til áframhaldandi skuldsetningar greinarinnar, og formaður Samtaka fiskframleiðenda og útflytjenda vill að þjóðin fái að ráða hvaða leið verður farin.

Sáttanefndin um stjórn fiskveiða lauk störfum í gær. Á meðal þess sem meirihluti nefndarinnar leggur til er að áfram verði stuðst við aflamarkskerfi, og að heimildir til aflaheimilda verði þrengdar og viðskipti með þær fari fram á opinberum markaði. Þá telur starfshópurinn, að undanskildum LÍÚ, að nauðsynlegt sé að skýrt ákvæði um þjóðareign á auðlindinni komi í stjórnarskrána. Ekki náðist sátt í nefndinni um að fara svokallaða tilboðsleið eða fyrningaleið Samfylkingarinnar, og vill meirihlutinn að samið verði við núverandi kvótaeigendur, um afnotarétt til tíu til tuttugu ára og þeir greiði gjald fyrir.Guðbjartur Hannesson, formaður sáttanefndar í sjávarútvegi, segir að það sem meirihluti hópsins standi fyrir sé ekki óskaniðurstaða sín, þó hún sé hugsanlega fær, enda komi það ágætlega fram í skýrslunni að hann hafi lagt fram tilboðsleið og telji fulla ástæðu til að skoða hana líka. Nú taki hins vegar ráðuneytið við og finni út hvað gera eigi í framhaldinu.Fulltrúi Borgarahreyfingarinnar í nefndinni skilaði séráliti. Hann er ósáttur við störf nefndarinnar og niðurstöðu í ljósi gríðarlegrar skuldsetningar greinarinnar.Finnbogi Vikar, sjómaður, segir þetta leiða til þess að réttur útgerðarmanna til að selja sig út úr greininni verði áfram við lýði. Það þýði að þeir sem ætli sér að starfa í greininni muni áfram vera skuldsettir í bankakerfinu og að þeir greiði fyrir það háa vexti og afborganir. Þetta verði til þess að enginn afgangur verði eftir fyrir auðlindagjaldið.Samtök fiskframleiðenda og útflytjenda áttu fulltrúa í sáttanefndinni. Formaður samtakanna, Elín Björg Ragnarsdóttir, segir niðurstöðu hennar ákveðin vonbrigði, því taka hefði þurft á vanda fiskveiðistjórnunarkerfisins í heild sinni. Hún vill að þjóðin fái að ráða hvaða leið verði farin, í þjóðaratkvæðagreiðslu.

Málaflokkar:

Innlendar fréttir

Atvinnulíf

Sjávarútvegsmál

Stjórnmál

Krefjast þjóðaratkvæðagreiðslu

runi — Tue, 07 Sep 2010 18:28:07 +0000

Framkvæmdastjóri Samtaka fiskframleiðenda og útflytjenda segir að ekki hafi verið einhugur hagsmunaaðila í starfshópi um endurskoðun laga um stjórn fiskveiða. Samtökin krefjast þjóðaratkvæðagreiðslu um málið.

Framkvæmdastjóri Samtaka fiskframleiðenda og útflytjenda segir að ekki hafi verið einhugur hagsmunaaðila í starfshópi um endurskoðun laga um stjórn fiskveiða. Samtökin óttast undirboð og vilja að stjórnvöld leggi báðar leiðir, -tilboðsleiðina og samningaleiðina, í þjóðaratkvæðagreiðslu. Í dag var greint frá því að starfshópur sjávarútvegsráðherra um endurskoðun á fiskveiðistjórnunarkerfinu hafi lagt til að samið verði við útgerðir landsins um auðlindagjald. Formaður hópsins segir að aldrei muni nást sátt um fyrningarleið veiðiheimilda. Samtök fiskframleiðenda og útflytjenda voru þátttakendur í starfi starfshóps um endurskoðun laganna og störfuðu þar allan þann tíma sem hópurinn starfaði. Elín Björg Ragnarsdóttir, framkvæmdastjóri samtakanna, segir að það sé ekki rétt að einhugur sé í nefndinni. Samtökin hafi viljað sjá heildstætt kerfi þar sem bæði væri horft til útgerðar og vinnslu. Núverandi kerfi væri á margan hátt gallað og veiti handhöfum aflaheimilda, sem jafnframt hafa vinnslur, umtalsvert forskot í samkeppni.Handhafar aflaheimilda hafi greiðari aðgang að hráefni og geti keypt það af sjálfum sér á mun lægra verði en gengur og gerist almennt á mörkuðum. Þá séu þeir í aðstöðu til að yfirbjóða á öðrum mörkuðumElín sér ekki aðra leið en að fara í þjóðaratkvæðagreiðslu ef á að nást sátt við þjóðina. Að þjóðin sem eigandi auðlyndarinnar fái að eiga síðasta orðið.

Málaflokkar:

Innlendar fréttir

Sjávarútvegsmál

Vilja fara samningaleiðina

asrunbi — Tue, 07 Sep 2010 12:55:13 +0000

Starfshópur sjávarútvegsráðherra um endurskoðun á fiskveiðistjórnunarkerfinu leggur til að samið verði við útgerðir landsins um auðlindagjald. Guðbjartur Hannesson, formaður hópsins segir að aldrei muni nást sátt um fyrningarleið veiðiheimilda.

Sjávarútvegsráðherra skipaði starfshóp í júlí, til að fjalla um endurskoðun á fiskveiðistjórnunarkerfinu, svokallaða sáttanefnd um stjórn fiskveiða. Hópinn skipuðu sextán manns, fulltrúar stjórnmálaflokka og félaga í sjávarútvegi. Starfshópurinn lauk störfum í gær.Guðbjartur Hannesson skilaði sjávarútvegsráðherra tillögum hópsins í hádeginu. Hann segir að með samningaleiðinni verði með formlegum hætti gengið frá því hver afnotarétturinn sé að auðlindinni. Gengið sé út frá þeirri meginforsendu að auðlindin sé þjóðareign og afnot af henni eingöngu leigð út tímabundin. Jafnræðis verði gætt þegar verið sé að bæta í eða breyta aflaheimildum, segir Guðbjartur.Meirihluti hópsins vildi ekki fara tilboðsleiðina, sem einnig hefur verið nefnd fyrningarleið.

Málaflokkar:

Innlendar fréttir

Sjávarútvegsmál

Skotar sniðganga ráðstefnu

asrunbi — Tue, 07 Sep 2010 08:53:11 +0000

Samtök skoskra sjómanna sniðganga ráðstefnu Norræna ráðherraráðsins um veiðar uppsjávartegunda á Norður Atlantshafi sem hefst í Þórshöfn í Færeyjum í dag. Sjómennirnir vilja með því sýna óánægju sína með þann makrílkvóta sem Fælreyingar skömmtuðu sér.

Struan Stevenson, þingmaður Skota á Evrópuþinginu, situr alla ráðstefnuna. Stevenson, sem er varaformaður sjávarútvegsnefndar þingsins, hefur krafist þess að Evrópusambandið setji innflutningsbann á vörur frá Færeyjum og Íslandi vegna makrílveiðanna. Fulltrúar skoskra sjómanna hitta þingmenn á skoska þinginu á fimmtudag til að kynna þeim stöðu mála.

Málaflokkar:

Innlendar fréttir

Sjávarútvegsmál

Sjávarútvegsráðstefna í Færeyjum

berglinde — Sat, 04 Sep 2010 18:52:22 +0000

Evrópuþingmaður, sem hefur hvatt til þess að Íslendingum og Færeyingum verði bannað að landa fiski innan Evrópusambandsins vegna makríldeilunnar sækir ráðstefnu Norræna ráðherraráðsins í Færeyjum eftir helgi. Þar á að ræða veiðiheimildir á makríl og öðrum uppsjávarfiski. Þingmaðurinn segist vilja ræða málin við færeyska og íslenska ráðherra. Hvorki forsætisráðherra Íslands né sjávarútvegsráðherra sækja ráðstefnuna.

Ráðstefnan hefst í Þórshöfn í Færeyjum á þriðjudaginn og lýkur á fimmtudaginn. Rætt verður um veiðar á uppsjávarfiski og skiptingu veiðiheimilda á síld, makríl, loðnu og kolmuna í Norður-Atlantshafi.Ætla má að makríldeila Íslendinga og Færeyinga við Evrópusambandið og Noreg verði þá rædd.Skoski Evrópuþingmaðurinn Struan Stevenson hefur boðað komu sína á ráðstefnuna. Hann verður fulltrúi Evrópuþingsins, en Stevenson á sæti í sjávarútvegsnefnd þess. Hann hefur gagnrýnt makrílveiðar Íslendinga og Færeyinga sem Evrópusambandið hefur sagt vera óhóflegar. Evrópuþingmaðurinn hefur lagt til að löndunarbann verði sett á Ísland og Færeyjar innan Evrópusambandsins meðan veiðunum verði framhaldið. Í frétt á vefsíðu sinni segir Stevenson að ásamt honum verði fulltrúar framkvæmdastjórnar Evrópusambandsins á ráðstefnunni. Honum gefist færi á að ræða beint við íslenska og færeyska ráðherra um málið. Hann voni að hægt verði að leysa deiluna með samningum. Hann segir að miðað við þær upplýsingar að Íslendingar hafi þegar veitt um 75% af óhóflegum kvóta, sem þeir hafi ákveðið einhliða, sé mikilvægt að ná lendingu sem allra fyrst til að koma í veg fyrir hrun á makrílstofninum. Stevenson segist meira en fús til að rétta fram sáttarhönd en Íslendingar og Færeyingar verði að vita að ESB sé alvara í málinu.Ekki er þó víst að Stevenson fái að ræða við íslenska ráðamenn á ráðstefunni. Þær upplýsingar fengust úr forsætisráðuneytinu að þó Jóhanna Sigurðardóttir, forsætisráðherra komi til Færeyja á mánudagskvöldið í opinbera heimsókn fram á miðvikudag sæki hún ekki ráðstefnuna. Úr sjávarútvegs- og landbúnaðarráðuneytinu fengust þær upplýsingar að Jón Bjarnason, ráðherra, færi ekki á ráðstefnuna heldur yrði sérfræðingur úr ráðuneytinu fulltrúi þar.

Málaflokkar:

Erlendar fréttir

Sjávarútvegsmál

Segja ákvörðun ráðherra ólöglega

thorgunnuro — Wed, 01 Sep 2010 11:09:20 +0000

Ákvörðun sjávarútvegsráðherra að gefa ekki út aflamark í úthafsrækju á komandi fiskveiðiári er ólögleg samkvæmt lögfræðiáliti sem unnið hefur verið fyrir Landssamband íslenskra útvegsmanna. Ráðuneytinu hefur verið kynnt álitið.

Í álitinu segir að veigamikil og málefnaleg rök þurfi til að ráðherra sé heimilt að líta framhjá tillögum Hafrannsóknastofnunarinnar. Það eigi sérstaklega við þar sem tillaga stofnunarinnar var algjörlega hunsuð í því tilviki sem hér er til skoðunar. Ákvörðunin standist ekki lög um stjórn fiskveiða og er því ólögmæt og sé því ógildanleg.Í fréttatilkynningu bendir LÍÚ á að á fiskveiðiárinu, sem lauk í gær, hafi allur sjö þúsund tonna rækjukvótinn veiðst, en ákvörðun ráðherra um að gefa ekki út aflamark hafi byggst á því að veiðar á rækju hefðu á undanförnum árum verið undir leyfilegum heildarafla.

Málaflokkar:

Innlendar fréttir

Sjávarútvegsmál