RÚV okkar allra
Hér upplýsum við um starfsemina, bjóðum upp á samtal og svörum spurningum þínum

Scandinavian screening haldin í fyrsta sinn á Íslandi

Mynd með færslu

Þann 6. – 8. júní er kaupstefnan Scandinavian screening haldin í Hörpu en þar koma saman stærstu kaupendur sjónvarpsefnis og kvikmynda í heiminum til að kynna sér og festa kaup á norrænu sjónvarpsefni. Kaupstefnan er haldin hérlendis vegna rammasamnings RÚV við DR Sales um samstarf við að kynna, selja og dreifa efni RÚV og annarra innlendra framleiðenda á alþjóðamarkaði. Alls verða 30 leiknar þáttaraðir og heimildamyndir kynntar í ár og vegna staðsetningar verður íslenskt efni í öndvegi. Þetta er því einstakt tækifæri fyrir það íslenska sjónvarpsefni sem DR-Sales hefur tekið að sér að kynna og selja og stuðla þannig að auknum samskiptum við áhrifamikla erlenda kaupendur frá 60-70 löndum.

Í tilefni af kaupstefnunni hefur RÚV beðið Kim Christiansen, ritstjóra og umsjónarmann samframleiðslu heimildarmynda hjá DR Sales að halda erindi og eiga samtal við íslenska framleiðendur. Þar mun hann ræða hvernig hámarka megi líkur á að heimildamyndir nái flugi sem víðast á erlendri grundu, út frá tækni- og efnislegum forsendum og hvað ræður jafnan úrslitum um að heimildamyndir komist á dagskrá hjá sjónvarpsstöðvum á alþjóðlegum mörkuðum. Fyrirlesturinn fer fram miðvikudaginn 7. júní kl. 13:00 – 14:30 í Efstaleiti 1. Áhugasamir geta skráð sig á ruv.is/kim-christiansen. 

DR Sales er reynslumesti, stærsti og sérhæfðasti aðilinn í sölu á norrænu sjónvarpsefni og hefur náð eftirtektarverðum árangri á því sviði. Það er afrakstur áratugalangs frumkvöðlastarfs, m.a. við að koma hinum geysivinsælu glæpaseríum Nordic Noir og öðrum leiknum þáttaröðum á alþjóðlegan markað og í sýningar á sjónvarpsstöðvum og efnisveitum um heim allan.

Norrænar sjónvarpsstöðvar og kvikmyndasjóðir standa að Scandinavian Screening og nú í fyrsta sinn eru RÚV og Kvikmyndamiðstöð Íslands aðilar að kaupstefnunni. Kaupstefnan er haldin annað hvert ár, hingað til í DR-Byen í Kaupmannahöfn og SVT í Stokkhólmi.

Markmiðið með Scandinavian Screening:

Styrkja stöðu kvikmynda og sjónvarpsefnis frá Norðurlöndum á alþjóðamörkuðum. „Nordic“ er og verður vörumerki sem lýsir gæðum, frumkrafti og framtíðarsýn hvar sem kvikmynda- og sjónvarpsdagskrágerð er rædd.

Styrkja fjárhagslegan grundvöll norrænnar kvikmynda- og sjónvarpsframleiðslu.

Treysta í sessi norrænan kvikmynda- og sjónvarpsiðnað - og þar með Norræna menningu, hugverk og handverk - með því að stuðla að áframhaldandi útbreiðslu og velgengni á alþjóðavísu.

Vettvangur fyrir sjónvarpsstöðvar, framleiðendur og dreifingaraðila til að byggja framleiðslu- og viðskiptasambönd og til að deila þekkingu og  þróun á norrænu sjónvarpsefni.

Hverjir koma?

Kaupendur

Til kaupstefnunnar eru komnir 100 kaupendur frá sjónvarpsstöðvum og efnisveitum frá um 70 löndum, aðallega frá Evrópu en einnig frá Bandaríkjunum og víðar. Kaupendur eru að leita að alls kyns sjónvarpsefni, þar á meðal leiknum þáttum og þáttaröðum, heimildamyndum og –þáttum, barnaefni, menningarefni og afþreyingarefni, bæði hinu frumgerða sjónvarpsefni og mögulegri endurgerð, svokölluðu „format“.

Dreifingaraðilar og söluaðilar

Allar opinberu sjónvarpsstöðvarnar á Norðurlöndum, RÚV, DR, YLE, SVT og NRK, verða sölu- og kynningaraðilar á kaupstefnunni ásamt aðilum frá Nordisk Film & TV fond, NordicWorld og Kvikmyndamiðstöð Íslands.

RÚV bindur vonir við að Scandinavian Screening auki hróður íslenskrar dagskrárgerðar og verði lyftistöng fyrir framleiðslu á íslensku sjónvarpsefni. Í ljósi velgengni undanfarinna ára hefur eftirspurn eftir norrænu sjónvarpsefni aukist til muna og vonast er til þess að festa íslenskt efni í sessi sem ómissandi þátt í vönduðu norrænu sjónvarpsefni.