RÚV okkar allra
Hér upplýsum við um starfsemina, bjóðum upp á samtal og svörum spurningum þínum

Leiðréttingar við grein forstjóra einkamiðla sem birtist í Morgunblaðinu og Fréttablaðinu

Mynd með færslu
 Mynd: RÚV
Í dag birtist í Morgunblaðinu og Fréttablaðinu, aðsend grein frá forstjórum nokkurra einkarekinna ljósvakamiðla, Útvarps Sögu, ÍNN, Sjónvarps Símans, 365 og Hringbrautar. Þar ítreka þeir fyrra ákall sitt um lagabreytingar til að styrkja stöðu fyrirtækja sinna á ljósvakamarkaði.

Í grein forstjóranna er farið rangt með um fjármögnun RÚV og annarra almannaþjónustumiðla í Evrópu. Skulu þær staðreyndarvillur leiðréttar hér.

Í greininni er fullyrt að íslenska ríkið greiði „næsthæstu upphæð á hvern íbúa til síns ríkismiðils”. Þetta er alls ekki rétt og reyndar nokkuð langt frá hinu sanna eins og sjá má ef skoðaðar eru opinberar tölur frá EBU. Staðreyndin er sú að ríki allra nágrannaríkjanna borga meira á hvern íbúa (per capita) með sínum ríkismiðli en Ísland gerir. Þannig er meira borgað á hvern íbúa með ríkismiðli Noregs, Svíþjóðar, Finnlands, Danmerkur og Bretlands en gert er á Íslandi, þrátt fyrir þá augljósu staðreynd að fjöldi íbúa hérlendis er margfalt minni en í tilfelli allra þessara þjóða.

Í grein forstjóranna er því enn fremur haldið fram að Ríkisútvarpið sé eini almannaþjónustumiðillinn í Evrópu sem er fjármagnaður að hluta með auglýsingatekjum. Þetta er ekki rétt, því eins og fram kemur í samantekt EBU (European Broadcasting Union) og í ársskýrslu fjölmiðlanefndar er blanda ríkisframlags og tekna af auglýsingum (eins og raunin er hjá RÚV) algengasta fyrirkomulag fjármögnunar hjá almannaþjónustumiðlum í Evrópu. Af 45 markaðssvæðum í Evrópu eru 36 með blandaða fjármögnun auglýsinga og þjónustutekna. Í 18 þessara ríkja er meira en 10% af tekjum miðlanna auglýsingatekjur.

Leiðréttist hvort tveggja hér með.

 

13.02.2017 kl.22:05
Samskiptasvið RÚV
Birt undir: Í umræðunni, Í umræðunni