Vígsla Veraldar – húss Vigdísar

20.04.2017 - 14:00
Mynd með færslu
 Mynd: HÍ
Bein útsending frá vígslu Veraldar – húss Vigdísar og opnunar Vigdísarstofnunar – alþjóðlegrar miðstöðvar tungumála og menningar.

 

Við opnun hússins verður slegið upp hátíðardagskrá tengdri tungumálum. Hátíðin hefst í Háskólabíói kl. 15. Yfirskrift hennar er „Tungumál ljúka upp heimum“ og þar munu fjölmargir innlendir listamenn og kórar flytja tónlist og önnur verk á ótal tungumálum.

Auk þess ávarpa samkomuna þau Vigdís Finnbogadóttir, velgjörðarsendiherra tungumála hjá UNESCO, Irina Bokova framkvæmdastjóri UNESCO,  Guðni Th. Jóhannesson, forseti Íslands, Rigmor Dam, mennta- og menningarmálaráðherra Færeyja, Auður Hauksdóttir, forstöðumaður Stofnunar Vigdísar Finnbogadóttur, Jón Atli Benediktsson, rektor Háskóla Íslands, Mònica Pereña, forseti Linguapax International, og Auður Ava Ólafsdóttir, rithöfundur og forstöðumaður Listasafns Háskóla Íslands.

Nánari upplýsingar um hátíðardagskrána.

Að lokinni hátíðardagskrá verður gengið að nýbyggingunni þar sem Vigdís Finnbogadóttir og Jón Atli Benediktsson bjóða gestum að ganga í bæinn. Á leiðinni milli húsanna hljóma söngvar frá ýmsum löndum.

Við vígslu hússins verður jafnframt opnuð sýningin „SAMTAL – DIALOGUE“ í sýningarsal hússins.  Þar er fjallað í máli og myndum um störf og hugðarefni Vigdísar Finnbogadóttur, fyrrverandi forseta Íslands. Munir á sýningunni eru í eigu Vigdísar Finnbogadóttur sem góðfúslega lánar þá á sýningartíma.

Nánari upplýsingar um sýninguna.