Víðtæk efnahagsleg áhrif Sýrlandsstríðs

05.02.2016 - 05:25
Mynd með færslu
Aleppo.  Mynd: YouTube
Efnahagsleg áhrif borgarastríðsins í Sýrlandi og áhrif þess á nágrannaríki er metið á 35 milljarða Bandaríkjadala, jafnvirði um 4.500 milljarða króna, og fer hækkandi. Frá þessu greinir Alþjóðabankinn í ársfjórðungsskýrslu sinni.

Upphæðin er miðuð við gengi ársins 2007 og jafngildir vergri landsframleiðslu Sýrlands það ár. Þeir 630 þúsund flóttamenn sem hafa farið frá Sýrlandi til Jórdaníu kosta Jórdani meira en tvo og hálfan milljarð dala á ári, sem er um sex prósent vergrar landsframleiðslu þeirra og fjórðungur fjárlaga jórdönsku stjórnarinnar.

Í skýrslunni segir að nágrannaríki Sýrlands eigi öll í vandræðum með fjárlagaáætlanir sínar vegna átakana. Atvinnuleysi meðal flóttamanna er hátt, sérstaklega meðal kvenna og þeirra sem eru óvanir vinnumarkaði án verndar. Um átta prósent sýrlenskra flóttamanna í Líbanon eru á atvinnusamningi. Yfir helmingur þeirra er á skammtímasamningi, jafnvel á viku- eða dagssamningum á lágum launum.

 


Deila frétt



Róbert Jóhannsson
Fréttastofa RÚV
05.02.2016 - 05:25