Vatn flæðir yfir veg og malbik flettist af

13.03.2016 - 22:29
Mynd með færslu
Mynd úr safni  Mynd: Jón G. Guðjónsson  -  RÚV
Vatn flæðir yfir veg númer 823 við Hrafnagil í Eyjafirði og hann telst því ekki fær minni fólksbifreiðum. Malbik er farið að fléttast af veginum við Kolgrafarbrú á Snæfellsnesi og þar er ekkert ferðaveður. Þetta kemur fram í tilkynningu frá Vegagerðinni. Búið er að lýsa yfir óvissustigi vegna snjóflóðahættu á sunnanverðum Vestfjörðum.

 

Jón Elfar Hjörleifsson, bóndi í Hrafnagili, er með jarðir báðum megin við veginn. Hann var að gefa um hálf níu og varð þá var við smá vatn. „Ég held að ég hafi verið burtu í hálftíma og þegar ég kom aftur var þó nokkur kafli kominn í kaf.“ Jón Elfar þurfi líka að fara að Laugalandi þar sem vatn var farið að flæða renna inn í fjós. „Það er alveg skuggalega hlýtt,“ segir Jón.

Óveður er mjög víða á Reykjanesi, Vesturlandi, Snæfellsnesi, Vestfjörðum, og Norðurlandi að Mývatni.

Hellisheiði er hálkulaus en þar er mikill þoka.  Vegir eru að mestu auðir á Suðurlandi þótt hálkublettir eða krapi séu á fáeinum stöðum inn til landsins. Mjög hvasst er á Kjalarnesi og undir Hafnarfjalli.

Enn eru hálkublettir eða krapi á fáeinum vegum á Vesturlandi en Fróðárheiði er lokuð. Mjög hvasst er á norðanverðu Snæfellsnesi og Laxárdalsheiði. Hálkublettir og mjög hvasst er á Holtavörðuheiði og Bröttubrekku.

Á Vestfjörðum er víðast hálka eða krapi og mikið hvassviðir. Þungfært er á Innstrandavegi.

Vegir á Norðurlandi eru víða auðir en þó er eitthvað um hálkubletti.  Mjög hvasst er á Norðurlandi vestra.

Á Austur- og Suðausturlandi eru vegir mikið til auðir þótt hálkublettir séu á einstaka vegum.

 


Deila frétt



Freyr Gígja Gunnarsson
Fréttastofa RÚV
13.03.2016 - 22:29