Tveir nemendur eftir í Birkimelsskóla

25.02.2016 - 11:48
Mynd með færslu
 Mynd: Jóhannes Jónsson  -  Ríkisútvarpið ohf
Einungis tveir nemendur verða í Birkimelsskóla á Barðaströnd á næsta ári. Börn skólans eru nú fimm en mun fækka í tvö þegar þrjú börn útskrifast úr 10. bekk í vor. Íbúar á Barðaströnd hafa lýst yfir áhyggjum sínum af lokum skólastarfsins.

Ekki pólitískur vilji að loka skólanum

Þórir Sveinsson, skrifstofustjóri bæjarstjórnar Vesturbyggðar, segir ekki vera pólitískan vilja til að leggja skólann niður en rétt að taka skólahaldið til endurskoðunar. Málefni Birkimelsskóla voru tekin fyrir á sveitarstjórnarfundi í gær þar sem var bókað að skólahald á Birkimel verði tekið til skoðunar með hagsmuni barnanna að leiðarljósi: „Kannaðar verði allar mögulegar leiðir, til dæmis heima- og fjarkennslu eða blandað fyrirkomulag.“ Ef til lokunar komi, þá verði sú ákvörðun tekin til endurskoðunar um leið og forsendur breytast, þá ef börnum fjölgar að nýju. Ekki standi til að leggja skólann niður eða selja húsnæðið. Börnin sem verða eftir í skólanum í vor eru í elstu bekkjum grunnskólans.  Birkimelsskóli er í 45 km fjarlægð frá Patreksfirði, þó er á leiðinni fjallvegur um Kleifaheiði, sem getur verið ófær að vetri til.

Óska eftir aðkomu sérfræðings

Bæjarstjórn hefur óskað eftir aðkomu Ingvars Sigurgeirssonar, skólaráðgjafa við ákvarðanatöku um skólann og áframhaldandi fyrirkomulag. Þá verður fundað með Ingvari, bæjarráði, fræðslu- og æskulýðsráði og foreldrum barna á leik- og grunnskólaaldri á Barðaströnd. Í bókun bæjarstjórnar segir jafnframt að bæjarstjórn sé kunnugt um þá jákvæðu þróun sem á sér stað með nýliðun í búsetu á Barðaströnd.  

Íbúar ósáttir

Íbúar á Barðaströnd sendu nýlega inn grein á bb.is þar sem líst er yfir áhyggjum af því að missa skólastarfið úr sveitinni hvað varðar nýliðun: „Frá aldamótum hefur verið mikil uppbygging á mörgum jörðum og miklar fjárfestingar sem gera jarðirnar áhugaverðar til búskapar til framtíðar, til ættliðaskifta... Það að hafa skólann hér á Barðaströnd skiptir öllu um framtíð byggðar og ekki síst þau störf sem honum fylgja.“ Einnig er líst yfir áhyggjum af því að fólk flytjist á brott við lokun skólans, eins og hafi verið raunin þegar grunnskólanum í Örlygshöfn var lokað.

 


Deila frétt



Mynd með færslu
Halla Ólafsdóttir
Fréttastofa RÚV
25.02.2016 - 11:48