Tilfinningar tengdar sambandsslitum

07.08.2017 - 09:00
Mynd með færslu
 Mynd:  -  Youtube
Urges er fyrsta sólóverkefni tónlistarmannsins Ragnars Ólafssonar, en hann hefur verið virkur í íslensku tónlistarlífi í meira en áratug, í hljómsveitum á borð við Árstíðir, Sign, Ask the Slave og Momentum. Tónlistin á Urges [ísl „Hvatir“] er fremur lágstemmd, og hvert lag segir sína sögu um tilfinningar tónlistarmannsins í kjölfar sambandsslita.

Ragnar er í seinni tíð best þekktur fyrir störf sín með hljómsveitinni Árstíðum, en sveitin hefur notið mikillar hylli heima og erlendis. Hefur hróður þeirra borist víða, og sérstaklega eftir að myndbandsupptaka af meðlimum, að syngja á lestarstöð árið 2013, fór í dreifingu á netinu og sló í gegn á heimsvísu. Samkvæmt teljara Youtube hafa rúmlega 6 milljónir manna horft á myndbandið.

Fjölmargir vinir Ragnars lögðu honum lið við gerð plötunnar, en hún var að mestu unnin í stúdíó E7 í Reykjavík. Ragnar sá sjálfur um upptökur, en nafni hans og samstarfsmaður Ragnar Sólberg hljóðblandaði. Útgáfan Alda Music sér um rafræna dreifingu Urges, og er platan nú fáanleg í gegnum flestar streymisveitur. Gerð hafa verið tónlistarmyndbönd við þrjú lög af plötunni, og hafa þau þegar fengið töluverða spilun á samfélagsmiðlum.

Ragnar er nýkominn úr tveggja vikna tónleikaferð um Póland, þar sem hann flutti lögin af nýju plötunni sinni. Samkvæmt fréttatilkynningu var honum vel tekið af hljómleikagestum, og fékk í framhaldinu vinsamlega umfjöllun í pólskum fjölmiðlum.  
 
Ragnar ólst upp í Svíþjóð og var virkur í tónlistarsenunni í Gautaborg þar sem hann spilaði með tónlistarmönnum á borð við Jens Lekman og Olof Dreijer (The Knife). Eftir að hann fluttist til Íslands, 22 ára gamall, lærði hann raftónlistarsmíðar og klassískan söng við Tónlistarskóla Kópavogs, og hefur síðan fengist við tónsmíðar fyrir kvikmyndir og auglýsingar, verið trúbador, jazzpíanisti og þungarokkssöngvari, auk fyrrnefndra starfa með vinsælum hljómsveitum.

Mynd með færslu
 Mynd: Ragnar Ólafsson
Umslag plötunnar
Mynd með færslu
Matthías Már Magnússon
dagskrárgerðarmaður
Mynd með færslu
Nína Richter
vefritstjórn
Poppland
Þessi þáttur er í hlaðvarpi
Plata vikunnar á Rás 2
Plata vikunnar