Þjóðvegur eitt í 360 gráðum

19.07.2016 - 15:37
Mynd með færslu
 Mynd: RouteOne  -  Youtube
Sigur Rós og RÚV keyrðu hringinn í kringum landið fyrr í sumar í 24 klukkustunda hægvarpsútsendingu. Upptakan er nú komin á netið í bæði háskerpu og 360 gráðu myndböndum, auk þess sem sérstakt smáforrit hefur verið gefið út. Hægvarpið verður endursýnt í kvöld.

Hljómsveitin Sigur Rós og RÚV tókust á við Þjóðveg eitt saman í hægvarpsútsendingu sem stóð í einn sólahring, 20. - 21. júní síðastliðinn. Um 500 þúsund manns horfðu á útsendinguna sem endaði á frumflutningi á nýjasta lagi Sigur Rósar, „Óveður“. Á meðan ferðinni stóð hljómaði Óveður undir í síendurútsettri útgáfu með aðstoð tónlistarforrits sem endurútsetti lagið í sífellu, sekúndu fyrir sekúndu.

Á vefsíðu Sigur Rósar og á Youtube er nú hægt að horfa á hægvarpið allt saman í 360 gráðum, þar sem áhorfendur geta snúið sjónahorninu sjálfir á alla kanta. Þá er einnig hægt að horfa á ferðina í háskerpu á síðunni, og fyrir þá sem kjósa heldur línulega dagskrá verður hægvarpið allt endursýnt á RÚV 2 frá kl. 21 í kvöld. Áhorfendum gefst einnig kostur á því að hlaða niður Route One smáforritinu í Apple-tæki, sem síendurútsetur lagið Óveður við hverja notkun.