Þingkosningar í Mongólíu
Kosið í Mongólíu. Mynd: AFP
Í dag fara fram þingkosningar í Mongólíu. Helsta kosningamálið er misskipting auðs en miklar auðlindir eru í jörðu í landinu. Fyrir nokkrum árum hófst námuvinnsla fyrir alvöru sem hefur valdið því að hagkerfi landsins hefur vaxið hratt.
Í jarðlögum Mongólíu er að finna mikið magn af kolum, kopar og gulli en þessar auðlindir hafa verið að mestu ónýttar þar til fyrir nokkrum árum.
Á síðustu árum hefur erlend fjárfesting fjórfaldast og námurisar eins og Rio Tinto eru þar fremstir í flokki. Loforð tveggja stærstu flokkanna eru svipuð, að jafna lífsgæðin og dreifa arðinum af auðlindunum betur en gert hefur verið.
Mongólía er staðsett mitt á milli Rússlands og Kína en þar búa 2,8 milljónir manna. Sjötíu ára valdatíð kommúnista lauk á friðsaman hátt árið 1990 og tveimur árum síðar voru fyrstu lýðræðislegu kosningarnar haldnar í landinu. Síðan þá hefur átt sér stað átakalítil þróun í það lýðræðislega kapítalistaríki sem það er í dag.
Samkvæmt skoðanakönnunum hefur Lýðræðisflokkurinn mest fylgi meðal kjósenda og ef það gengur eftir munu þeir taka við valdataumunum af Flokki fólksins. MPP (Mongolian People's Party) sem lengi hefur verið við stjórnvölinn.
Þessu mikla fjármagni sem flætt hefur inn í landið hefur leitt til ásakana um spillingu en fyrr á árinu var Nambar Enkhbayar, fyrrum forseti, ákærður fyrir spillingu. Enkhbayar neitar öllum ásökunum og hefur klofið sig frá MPP sem hann áður tilheyrði og stofnað sinn eigin flokk, Byltingarflokkinn. Þó að Enkhbayar megi ekki sjálfur bjóða sig fram til þings er framboð hans talin vera helsta ástæða þess að fylgi Flokks fólksins fer dvínandi.
Ertu með athugasemd vegna fréttarinnar? Sendu á frettir@ruv.is
