Takmarkað gagn af íþróttavörum
Skjáskot af vefsíðu Lucozade.
Skortur er á sönnunum fyrir því að íþróttadrykkir, prótínvörur og rándýrir íþróttaskór geri það gagn sem oft er lofað í auglýsingum. Þetta kemur fram í nýrri rannsókn fréttaskýringaþáttarins Panorama á BBC og tímaritsins British Medical Journal.
Hópur rannsakenda við Oxford-háskóla skoðaði 431 fullyrðingu um árangur í 104 auglýsingum um íþróttavörur. Vísindamennirnir segja sláandi hve lítið er um vandaðar rannsóknir sem styðja fullyrðingarnar.
Til dæmis segir í auglýsingum fyrir Lucozade Sport, vinsælasta íþróttadrykk Bretlands, að hann bæti bæði úthald, styrk og snerpu. GlaxoSmithKline, sem framleiðir drykkinn var beðinn um rannsóknir sem styddu þessi loforð. 176 rannsóknir voru reiddar fram, en vísindamönnunum þótti lítið til þeirra koma. Drykkurinn hefði lítil sem engin áhrif á meginþorra fólks.
GlaxoSmithKline framleiðir einnig fæðubótarefni undir merkinu Maxinutrition sem sögð eru hjálpa íþróttafólki að ná sér hraðar eftir erfiðar æfingar. Carl Henegan, sem fór fyrir rannsókninni, segir erfitt að halda slíku fram. Mike Lean, prófessor í næringarfræði, segir árangur af fæðubótarefnum takmarkaðan, ódýrara væri að fá sér mjólkurglas.
Vísindamennirnir rannsökuðu einnig fullyrðingar Puma um að hlaupaskór, sem hlaupagarpurinn Usain Bolt hefur auglýst, eigi að minnka líkur á meiðslum, auka þægindi og gefa aukinn hraða. Vísindamennirnir segja að engar sannanir hafi fundist fyrir því að þetta sé rétt. Puma neitaði að sýna vísindamönnunum rannsóknir sem styðja þessar fullyrðingar.
Ertu með athugasemd vegna fréttarinnar? Sendu á frettir@ruv.is
