Spillingin að koma upp á yfirborðið

Rannsóknarnefnd lífeyrissjóðanna kynnti niðurstöðu sína á föstudag. Hún var skipuð af lífeyrissjóðunum sjálfum og hafði því takmarkaða heimild til að óska eftir upplýsingum. Ekki þarf að lesa lengi í skýrslunni til að rekast á dæmi um að það hamlaði starfi nefndarinnar. Á bls. 67 segir til dæmis að einstaka starfsmenn lífeyrissjóðanna og eftirlitsaðila hafi borið fyrir sig þagnarskyldu gagnvart nefndinni. Einnig að Fjármálaeftirlitið hafi synjað nefndinni um gögn á grundvelli þagnarskylduákvæðis. Í september 2010 ályktaði Alþingi að óháð rannsókn þyrfti að fara fram á starfsemi lífeyrissjóðanna. Margrét Tryggvadóttir, þingmaður Hreyfingarinnar, segir að slík nefnd væri í mun betri stöðu til að kalla eftir upplýsingum og gæti því svarað fjölmörgum spurningum sem enn sé ósvarað. 

„Í þessari skýrslu sjáum við hverju sjóðirnir hafa tapað. Það eru dæmi um hitt og þetta en enginn er nafngreindur,“ segir Margrét. Margir hafi á tilfinningunni að það sé gríðarleg spilling í lífeyrissjóðakerfinu „Og þessi skýrsla nær ekki að sýna okkur hana. Maður sér glitta í hana en hún rétt kemur upp á yfirborðið.“

Í dag sendi Eygló Harðardóttir, þingmaður Framsóknarflokks, frá sér yfirlýsingu þar sem hún segist ætla að leggja fram þingsályktunartillögu þess efnis að Alþingi láti fara fram rannsókn á lífeyrissjóðunum frá árinu 1997 til dagsins í dag. 

Ertu með athugasemd vegna fréttarinnar? Sendu á frettir@ruv.is