Reglurnar um stigagjöf útskýrðar

Símkosning og dómnefndarkosning til helminga hafa gilt í Söngvakeppni evrópskra sjónvarpsstöðva frá árinu 2009, þegar stýrihópur Eurovision ákvað breyta þeirri ákvörðun að símkosning réði alfarið úrslitum. Þetta ákvæði á við um báðar forkeppnir Eurovision og lokakeppnina og hefur gefist vel.

Á hverju ári er fagfólk sem tengist tónlist valið í dómnefndir í öllum þátttökulöndunum. Dómnefndirnar hafa helmings vægi á móti símkosningu og síðan ræður summa samanlagðra niðurstaðna því hvernig atkvæðin raðast á þau lög sem hljóta stig.

Eins og verið hefur um langa hríð gildir sú regla að tíu lög fá stig sem raðast þannig að neðstu sjö lögin fá stig frá einum upp í sjö og síðan fá þrjú stigahæstu lögin átta, tíu eða tólf stig. Ekki er leyfilegt að gefa aðeins einu lagi 12 stig og láta þar við sitja heldur verður að gefa tíu lögum stig. Það lag sem dómnefnd veitir flest stig lendir í efsta sæti og svo koll af kolli. Það sama gildir um það lag sem fær flest atkvæði í símkosningu. Þannig verða til tveir listar, annarsvegar dómnefndar listi og hinsvegar símkosninga listi, sem eru lagðir saman og síðan er meðaltalið reiknað út og ræður sú niðurstaða endanlegri stigagjöf.

Þegar Söngvakeppni Sjónvarpsins var í undirbúningi í lok síðasta árs var ákveðið að hafa sama fyrirkomulag og viðhaft er í Eurovision, þ.e.a.s. að símkosningin gildi til helminga á móti dómnefnd.

Á þetta reyndi í fyrsta sinn í Söngvakeppni Sjónvarpsins árið 2012 og var öllum höfundum gerð skýr grein fyrir þessu fyrirkomulagi þegar þeir gengust inn á að taka þátt í keppninni. Var þessari reglu beitt í undankeppnunum þremur og síðan í lokakeppninni laugardagskvöldið 11. febrúar. Kynnar kvöldsins tóku nokkrum sinnum fram að dómnefndarkosning gilti til helminga á móti símkosningu.  Þar sem sjö lög kepptu var stigagjöfin miðuð við 4, 5, 6, 7, 8, 10 og 12 stig. Þau lög sem röðuðust í efstu þrjú sætin í símkosningu fengu því 12, 10 eða 8 stig eftir atkvæðamagni. Samskonar niðurröðun átti sér stað varðandi þau lög sem dómnefnd kaus.

Niðurstaða símkosningar var sú að þrjú lög hlutu 69,23% greiddra atkvæða og lögin þar fyrir neðan  skiptu á milli sín 33,77% með mismunandi miklu atkvæðavægi. Munurinn á milli fyrsta og annars sætis var 0,91% en milli annars og þriðja sætis 2,54%

Dómnefnd var með sömu þrjú lögin í fyrstu þremur sætunum og þeir sem greiddu í símkosningunni, en lögin röðuðust ekki nákvæmlega eins. Þar sem atkvæði hvors hóps fyrir sig gildir til helminga skiptir máli í hvaða sæti viðkomandi lög röðuðust innbyrðis. Niðurstaðan var ótvíræð, en ef lagið sem var í þriðja sæti í símkosningu hefði verið í öðru sæti hefði sú staða komið upp að þrjú efstu lögin hefðu endað með sömu stigatölu. Þegar svoleiðis atvik á sér stað er reglan sem notuð er í Eurovision sú að efsta sætið í símkosningunni vegur hærra en efsta sætið hjá dómnefnd, en á það reyndi ekki að þessu sinni.  

Ertu með athugasemd vegna fréttarinnar? Sendu á frettir@ruv.is