Slæmt ferðaveður á Vestfjörðum

16.02.2016 - 10:34
Mynd með færslu
 Mynd: Halla Ólafsdóttir  -  RÚV
Slæmt ferðaveður er á Vestfjörðum og eru flestir fjallvegir enn ófærir en þó er orðið fært yfir Gemlufallsheiði en þar er þæfingsfærð og mjög hvasst og blint. Vegurinn yfir Háldán er lokaður vegna óveðurs og umferðaróhapps.

Á Vesturlandi er hálka eða hálkublettir en snjóþekja Bröttubrekku, Svínadal og á sunnanverðu Snæfellsnesi. Nú er orðið fært yfir Holtavörðuheiði en þar er mjög hvasst og blint. Ófært er á Fróðárheiði. 

Í Norðurlandi er hálka á flestum vegum og víðast hvar mjög hvasst. Ófært er á Mývatnsöræfum en unnið að hreinsun. Flughálka er í Þistilfirði og við Bakkaflóa og einnig mjög hvasst.

Hálka er á flestum leiðum á Austurlandi en þó er flughálka  í Hjaltastaðaþinghá. Greiðfært er frá Reyðarfirði og að Höfn en þar fyrir vestan eru hálka á nokkrum köflum. 
 
Það eru hálkublettir og éljagangur á Reykjanesbraut og mjög víða á Reykjanesi. Hálka er á Sandskeiði og Hellisheiði og hálka eða hálkublettir á öðrum vegum á Suðurlandi.

Tafir urðu á innanlandsflugi í morgun vegna hvassviðrisins og verður athuga með flug í hádeginu.  


Deila frétt



Ásrún Brynja Ingvarsdóttir
Fréttastofa RÚV
16.02.2016 - 10:34