Segir ekki hafa verið farið að lögum

Þetta kemur fram í yfirlýsingu sem Víglundur sendi frá sér en blaðamannafundi með honum á jarðhæð Turnsins við Höfðatorg var að ljúka. Í yfirlýsingunni kemur einnig fram að Víglundur telji líklegt að ráðherrar í núverandi ríkisstjórn, einstakir starfsmenn nýju bankanna og skilanefndanna hafi gerst brotlegir við ýmis ákvæði íslenskra laga sem refsingar eru lagðar við. 

Yfirlýsinguna í heild sinni má lesa hér:

Stjórnvöld fóru ekki eftir reglum neyðarlaganna, sem ríkisstjórn Geirs H. Haarde setti og tóku gildi 6. október 2008. Einnig er ljóst að  skuldunautum Arion banka var mismunað í uppgjöri við bankann eftir efnahagshrunið. Líklegt er að ráðherrar í ríkisstjórn Jóhönnu Sigurðardóttur og Steingríms J. Sigfússonar, einstakir starfsmenn nýju bankanna og skilanefnda hafi gerst brotlegir við ýmis ákvæði íslenskra laga. 

Í skýrslu fjármálaráðherra um endurreisn viðskiptabankanna, sem birt var í mars 2011 er lýst atburðarás sem stangast á við reglur neyðarlaganna. Þetta varð til þess að undirritaður hóf eftirgrennslan um mál sem fjallað er um í skýrslunni. 

Eftir að Fjármálaráðuneytið neitaði að veita umbeðnar upplýsingar var leitað til Úrskurðarnefndar um upplýsingamál sem synjaði mér um aðgang að samningum um endurmat á lánasöfnum sem færð voru úr Kaupþingi hf. yfir í Arionbanka. Úrskurðurinn staðfesti hins vegar að í Arionbanka var gerður listi yfir skuldara sem vinna skyldi á til ávinnings fyrir skilanefndina. Sú vinna fór fram að frumkvæði og undir verkstjórn ríkisstjórnar Jóhönnu og Steingríms. Þá staðfestir úrskurðurinn að á listanum var meðal annarra að finna nafn fyrirtækis míns B.M. Vallár hf.

Staða Gamla Kaupþings gagnvart Nýja Kaupþingi var miklu verri en staða hinna gömlu bankanna samkvæmt skýrslu fjármálaráðherra (bls. 29). Skilanefnd Kaupþings skuldaði nýja bankanum 38 milljarða en í hinum bönkunum var staðan sú að nýju bankarnir skulduðu þeim gömlu. Á bls. 50-58 í skýrslunni er því lýst hvernig íslenska ríkið afhenti skilanefnd Kaupþings, sem fulltrúa erlendra kröfuhafa, nýja bankann og gaf þeim veiðileyfi á skuldara til að láta þá standa undir skuldum skilanefndarinnar. Til að ná árangri er ljóst ekkert jafnræði var gagnvart skuldurum heldur var sótt að þeim sem fengur var í, einstaklingum jafnt sem fyrirtækjum.

Með þessu verklagi er líklegt að ráðherrar, einstakir starfsmenn nýju bankanna og skilanefndanna hafi gerst brotlegir við ýmis ákvæði íslenskra laga sem refsingar eru lagðar við.

Full ástæða er til þess að þetta mál verði skoða mun betur og því hef þegar óskað skriflega eftir nánari upplýsingum frá Fjármálaráðuneytinu.

Undir þetta skrifar svo Víglundur Þorsteinsson. 

Ertu með athugasemd vegna fréttarinnar? Sendu á frettir@ruv.is