Reynt að lokka drengi upp í bíl

11.02.2016 - 13:32
Nærmynd af merki lögreglunnar með einkennisorðunum "Með lögum skal land byggja".
 Mynd: Þórgunnur Oddsdóttir
Reynt var að lokka drengi í þriðja bekk upp í bíl við Laugarnesskóla í morgun með því að bjóða þeim sælgæti. Í tölvupósti frá skólastjóra skólans til foreldra nemenda við skólann kemur fram að drengirnir hafi brugðist rétt við, sagt nei og sótt starfsmann.

Drengirnir hafi tekið eftir tegund bílsins, lit og hluta af númeri. Málið hefur verið tilkynnt til lögreglu. Sigríður Heiða Bragadóttir, skólastjóri í Laugarnesskóla, segir jafnframt að starfsmenn á útivakt hafi fengið fyrirmæli um að vera með aukna vakt á bílaumferð við skólann.

„Leiðarljós okkar í Laugarnesskóla er að fjalla um þessi mál sem sjálfsögð forvarnarmál líkt og við gerum þegar við fjöllum um hættur í umferðinni og annars staðar,“ segir Sigríður í tölvupóstinum. „Við höfum líka hugfast að vekja ekki upp óþarfa ótta hjá nemendum heldur fræða þá um hvað eigi að gera ef þeir lenda í aðstæðum sem þessum.“   

 


Deila frétt



Mynd með færslu
Fréttastofa RÚV
11.02.2016 - 13:32