Loftslagsstríðið

Gróðurhúsaáhrif eru ekki uppfinning nútíma vísindamanna í loftslagsfræðum, heldur uppgötvun nítjándu aldar vísindamanna, sem sýndu fram á einangrunareigindir sumra lofttegunda eins og koltvísýrings. Þegar gildi koltvísýrings í andrúmsloft tók að hækka hröðum skrefum á tuttugustu öld varð þessi þekking til þess að vísindamenn tóku að beina athyglina að áhrifum þess að hitastig jarðar, koltvísýringurinn lokar einfaldlega inni hluta af hitaútstreymi jarðar. Miðað við fyrirliggjandi þekkingu hlaut það að gerast, segir Michael Mann, einn þekktasti vísindamaður heims á sviði loftslagsfræða. Það hefði verið óskiljanlegt ef það hefði ekki gerst.  En þá bregður svo við að upp rísa öflugir hópar manna og afneita þessum vísindum og segja þau byggð á sandi. Aukin koltvísýringur vegna brennslu manna á jarðefnum séu hindurvitni. Um þetta, baráttuna fyrir viðurkenningu á vísindunum, fjallaði Mann í erindi á vegum Eddu, öndvegisseturs við Háskóla Íslands í dag. Mann er með orðum íslensks vísindamanns á þessu sviði, sennilega ofsóttasti vísindamaður heims. Frá því að hann birti ásamt samstarfsmönnum sínum hina svokölluðu hokkíkylfukúrfu þar sem reynt var að greina hvernig hitastig jarðar þróaðist í þúsund ár frá árinu 1000 til 2000. Niðurstaða Manns og félaga hans var sú að síðustu áratugir tuttugustu aldarinnar voru þeir hlýjustu á þúsund ár. Fyrir þetta var Mann úthrópaður sem falsari og hefur allar götur síðan átt fullt í fangi með að verja hendur sínar fyrir stjórnmálamönnum og spunameisturum, sem hann telur sjálfur að gangi fyrst og fremst hagsmuna olíuiðnaðarins. Mann hefur meira að segja þurft að sækja ákærum, þess hefur verið krafist að allir tölvupóstar hans mörg ár aftur í tímann  yrðu gerðir upptækir og rannsakaðir. Rætt er við Mann í Speglinum.

Ertu með athugasemd vegna fréttarinnar? Sendu á frettir@ruv.is