Cotwoldsway, lækningajurtir, hraun og víðerni
Lækningajurtir fíflar
Í þættinum fræðumst við um nýja bók um lækningajurtir, heyrum af skemmtilegri og fallegri gönguleið í Bretlandi. Þá er haldið í jarðfræðileiðangur á Reykjanesi og fræðst um hin fjölbreyttu hraun sem ekið er yfir á leiðinni til Keflavíkur. Að lokum eru óspillt víðerni til umræðu en þau eru ekki eins
Á síðustu árum hefur áhuginn fyrir ræktun og týnslu berja og jurta aukist mjög en sumir eru óöruggir í að greina jurtirnar og skortir þekkingu á notkun og virkni þeirra. Nýverið kom á markaðinn bókin „Íslenskar lækningajurtir“ eftir Önnu Rósu grasalækni, þar sem gerð er grein fyrir sögu jurtanna, notkun þeirra og virkni sem og vísindarannsóknum á þeim. Gullfallegar myndir Erlings Ólafssonar ættu að auðvelda mjög greininguna. Við heyrum af því. Fyrir nokkru fór Björn Jóhannsson í 160 kílómetra gönguferð eftir Cotwoldsway í Bretlandi sem liggur frá markaðsbænum Chipping Campden í norðri til Bath í suðri . Á leiðinni er mikið af skemmtilegum og mjög ólíkum þorpum með fjölbreyttum byggingum og kastalagörðum. Í einu er gaman að fá sér te, í öðru er það bjórinn sem freistar. Farið er í gegnum bjarta beikiskóga og yfir fallegar hæðir með góðu útsýni. Frá Bretlandi út á Reykjanes. Haldið er í jarðfræðiferðalag á Reykjanesi. Ekið gegnum Hrútagjárhraun sem rann úr gígum í Sveifluhálsi fyrir um 5000 árum, framhjá Afstapahrauni sem er frá sögulegum tíma . Og síðan yfir Þráinsskjaldarhraun sem rann alla leið til sjávar skömmu eftir síðasta kuldaskeið. Og að lokum inn á Miðnessheiðina sem er frá hlýskeiði og var upphaflega eyja.
Hér á landi tölum við oft um ósnortin víðerni sem eru þó ekki eins víðfeðm og ætla mætti. Í flokkunarkefi Alþjóðanátturuverndasamtakanna er lögð áhersla á að slík svæði beri lítil eða óveruleg merki um umsvif mannsins, þar séu ekki byggingar eða iðnaðarumsvif og að þau skuli vera órofin heild þar sem hægt sé að njóta kyrrðar og einveru. Við heyrum meira af því.
En fyrst er það spurning dagsins; við höldum vestur í Ísafjarðarbæ . Spurt er; hvenær var Ísafjarðarbær stofnaður, hvaða þéttbýlisstaðir heyra undir hann og við hvaða firði standa þeir? Einnig er spurt um Vestfjarðagöngin. Hvenær voru þau opnuð, hvaða þéttbýlisstaði tengja þau saman og hvað eru þau löng?
Ertu með athugasemd vegna fréttarinnar? Sendu á frettir@ruv.is
Tilkynna um bilaða upptöku
