Ræddi almennan samskiptavanda hjá lögreglu

16.01.2016 - 15:53
Mynd með færslu
 Mynd: Skjáskot  -  RÚV
Aldís Hilmarsdóttir, yfirmaður fíkniefnadeildar lögreglu höfuðborgarsvæðisins, ræddi almennan samskiptavanda innan embættisins, við Ólöfu Nordal innanríkisráðherra í gær.

Samkvæmt heimildum fréttastofu snerist fundurinn því ekki einvörðungu um samskipti Aldísar við Sigríði Björk Guðjónsdóttur lögreglustjóra, heldur um almennan og langvarandi samskiptavanda innan embættisins við lögreglustjórann. 

Aldís óskaði eftir fundinum með innanríkisráðherra þann 16. desember síðastliðinn. Hún vildi ekki tjá sig um það sem fram fór á fundinum í samtali við fréttastofu, hún reki ekki samskiptavanda sinn við lögreglustjórann í fjölmiðlum.

Lengi hefur verið stirt milli Aldísar og Sigríðar Bjarkar lögreglustjóra. Fullyrt hefur verið í fjölmiðlum að lögreglustjórinn vilji flytja deildarstjórann til í starfi. Þá hefur lögreglustjórinn sömuleiðis ekki lýst yfir nokkurs konar stuðningi við Aldísi í þeirri orrahríð sem nú geysar í kringum fíkniefnadeild lögreglunnar. 

Eins og kunnugt er sæta tveir lögreglufulltrúar fíkniefnadeildarinnar rannsókn Ríkissaksóknara annars vegar og Héraðssaksóknara hins vegar, vegna meintra brota í starfi. 


Deila frétt



16.01.2016 - 15:53