Perú: 16 létust í rútuslysi

19.01.2016 - 04:01
Mynd með færslu
Mikið fjalllendi er í Perú og fjallvegir margir og margvíslegir eftir því. Þessi liggur til fjallabæjarins Tarma í Junin-héraði, í hjarta Perú.  Mynd: TCP  -  Wikimedia
16 létust og tíu slösuðust þegar rúta fór út af fjallvegi í Perú í gær og endaði ofan í á, 35 metrum fyrir neðan veginn. Rútan var á leið til bæjarins Pichanaki í Junin-héraði í miðhluta landsins. Jose Mendoza, talsmaður lögreglu í Junin, segir fyrstu rannsóknir á vettvangi benda til þess að bílstjórinn hafi farið of hratt í beygju og misst stjórn á rútunni, með þessum afleiðingum. Rútan er gjörónýt.

Í frétt AFP um slysið segir að banaslys séu algeng í umferðinni í Perú. Það megi að hluta til þess, hve umferðarreglum er slælega framfylgt, en þröngir, hlykkjóttir og illa á sig komnir fjallvegir landsins eru líka sannkallaðar dauðagildrur, margir hverjir, og alræmdir sem slíkir.

 


Deila frétt



Ævar Örn Jósepsson
Fréttastofa RÚV
19.01.2016 - 04:01