Opið bókhald merkingarlítið
Prófessor í stjórnmálafræði segir það hafa litla þýðingu að opna bókhald forsetaframbjóðenda fyrir kosningar. Ríkisendurskoðun fari lögum samkvæmt ekki yfir gögnin fyrr en eftir kosningar og þá fyrst komi í ljós hvort sagt hafi verið satt og rétt frá.
Forsetaframbjóðendurnir sex hafa allir greint frá því hversu háum upphæðum þeir hafi úr að spila í kosningabaráttunni. Herdís Þorgeirsdóttir og Andrea Ólafsdóttir hafa einnig gert opinbert hverjir hafa styrkt þær í baráttunni og hvatt meðframbjóðendur sína til að gera það líka. Gunnar Helgi Kristinsson, prófessor í stjórnmálafræði, segir þessa kröfu dæmi um eðlilega taktík í kosningum.
„Ég held það megi alveg segja að krafan um opið bókhald sé tilraun, auðvitað þeirra sem hafa litla peninga, til þess að snúa þeim veikleika sinnar baráttu sér í hag og gera kosningabaráttu þeirra sem hafa úr meiru að spila tortryggilega ef hægt er,“ segir Gunnar Helgi.
Lögum samkvæmt skulu frambjóðendur skila uppgjöri til Ríkisendurskoðunar eftir kosningar. Ríkisendurskoðun birtir síðan útdrátt þar sem fram koma nöfn allra fyrirtækja sem styrkt hafa kosningabaráttuna og nöfn einstaklinga sem veittu framlög hærri en 200.000 krónur. Gunnar Helgi segir að þar sem Ríkisendurskoðun fari, lögum samkvæmt, ekki yfir gögnin fyrr en eftir kosningar, hafi það litla þýðingu að birta þau nú. Enginn muni athuga það hvort rétt hafi verið sagt frá.
Ertu með athugasemd vegna fréttarinnar? Sendu á frettir@ruv.is
