Bólusetningar og heilsuvernd
Bólusetningar eru afar mikilvægar í heilsuvernd segir Þórólfur Guðnason, yfirlæknir sóttvarna hjá Landlæknisembættinu. Þetta kemur fram í þættinum Okkar á milli á Rás 1 fimmtudaginn 15. desember. Rætt er um mislingafaraldur í Evrópu, viðbrögð við svínaflensunni, en líka tónlistaráhuga Þórólfs.
Þórólfur telur sig Vestmannaeying þótt hann eigi ættir að rekja upp á land. Hann segir af bílskúrsböndum og samheldni Eyjamanna, auk þess að ræða starf sitt, einkum um mikilvægi bólusetninga. Komið er inn á andúð ýmissa við bólusetningum og fullyrðingar um að þær geti valdið einhverfu. Þórólfur segir að engin slík tengsl hafi komið fram í rannsóknum. Sömuleiðis að viðbrögð íslenskra yfirvalda við svínaflensunni hafi ekki verið yfirdrifin, öðru nær. All margir Íslendingar hafi veikst alvarlega, og víðtæk bólusetning hafi komið í veg fyrir að verr færi.
Umsjón:
Hanna G. Sigurðardóttir
Vefsvæði Landlæknisembættisins
Okkar á milli fimmtudag 15. desember 2011 kl. 9.05
Ertu með athugasemd vegna fréttarinnar? Sendu á frettir@ruv.is
