Lögregla í Aþenu beitir táragasi

Fyrst birt: 12.02.2012 16:02, Síðast uppfært: 12.02.2012 16:34

Lögregla og grískir mótmælendur takast á utan við þinghúsið. Mynd:Nordic Photos/AFP.

Gríska lögreglan hefur beitt táragasi gegn mótmælendum fyrir utan þingið í Aþenu. Tugir þúsunda mótmælenda hafa safnast þar saman en þingmenn ræða nú frumvarp um niðurskurðaraðgerðir ríkisstjórnarinnar.

Gengið verður til atkvæða í kvöld eða nótt. Hiti hefur verið í umræðum innandyra. Þingmaður komúnistaflokksins kastaði frumvarpinu í gólfið með látum. Fjármálaráðherrann Evangelos Venizelos sagði að landið yrði gjaldþrota ef þingmenn samþykktu ekki lögin.
Lukas Papademos, forsætisráðherra Grikkja, varaði þjóðina í gær við því að kjör hennar yrðu sýnu verri ef aðhaldsaðgerðum yrði hafnað. Þriggja milljarða evra niðurskurður í ríkisútgjöldum er forsenda áframhaldandi lánafyrirgreiðslu Evrópusambandsins og Alþjóðagjaldeyrissjóðsins.

Ertu með athugasemd vegna fréttarinnar? Sendu á frettir@ruv.is

Til baka