EGILS SAGA vann Grímuna 2012
Íslensku sviðslistaverðlaunin, Gríman, voru haldin hátíðleg í Silfurbergi í Hörpu, fimmtudagskvöldið 14. júní. Veitt voru verðlaun í 18 flokkum, þar á meðal fyrir Útvarpsverk ársins 2012.
Þrjú verk voru tilnefnd til verðlaunanna og hlaut EGILS SAGA eftir Morten Cranner í leikstjórn Erlings Jóhannessonar verðlaunin.
Ingunn Ásdísardóttir þýddi leiktexta, Þórarinn Eldjárn bundið mál, Hildur Ingveldar- Guðnadóttir samdi tónlist og hljóðmeistari var Einar Sigurðsson.
EGILS SAGA var flutt í þremur hlutum af Útvarpsleikhúsi RÚV á Rás1 fyrr á árinu og er eitt viðamesta verkefni Útvarpsleikhússins á síðustu árum.
Menningarsjóður útvarpsstöðva og Tónskáldasjóður Ríkisútvarpsins styrktu verkefnið.
Mikill fjöldi leikara tók þátt í EGILS SÖGU og var þar fremstur í flokki leikara Ingvar E. Sigurðsson sem lék Egil frá barnsaldri til fullorðinsára.
Önnur verk sem tilnefnd voru sem Útvarpsverk ársins:
ÁSTAND eftir Ásdísi Thoroddsen í hljóðvinnslu Einars Sigurðssonar og leikstjórn höfundar. Gjóla ehf. framleiddi í samvinnu við Útvarpsleikhús RÚV með styrk frá Menningarsjóði Útvarpsstöðva. Verkið var flutt á Rás 1 í október sl.
FJALLA-EYVINDUR eftir Jóhann Sigurjónsson, í útvarpsleikgerð og leikstjórn Mörtu Noðdal. Verkið var flutt á Rás 1 á Nýársdag sl.
Ertu með athugasemd vegna fréttarinnar? Sendu á frettir@ruv.is
