Látin skáldkona leikur í útvarpsleikriti

12.05.2017 - 13:57
Mynd með færslu
 Mynd: Jakobína Sigurðardóttir
Í útvarpsleikritinu LÍFSHÆTTU eftir Þóreyju Sigþórsdóttur og í leikstjórn hennar, beitir hún því stílbragði að láta skáldkonuna Jakobínu Sigurðardóttur, sem lést árið 1994, leika eitt af aðalhlutverkunum. Leikritið byggir á tveim sögum Jakobínu, Lífshættu og Í sama klefa.

 

Jakobína las söguna Í sama klefa í útvarpið árið 1989. Það er þessi upptaka sem notuð er til að láta Jakobínu flytja allar setningar einnar persónu leikritsins, sem hún væri meðal leikara verksins.

Í leikritinu fléttast tvenn samtöl tveggja kvenna; annars vegar kvenna sem þekkjast ekki neitt en ná góðu sambandi og hins vegar æskuvinkvenna sem uppgötva að þær eru eiginlega hættar að þekkja hvor aðra og ná engum tengslum. Samtöl kvennanna snúast um þrár og drauma sem aldrei urðu að veruleika. Er það að þekkja einhvern endilega forsenda þess að ná góðum tengslum? Hvað hefði gerst ef þær hefðu sagt eða gert hlutina öðru vísi?

Útvarpsleikritið LÍFSHÆTTA var frumflutt í Útvarpsleikhúsinu haustið 2014 en verður endurflutt laugardaginn 13. maí kl 14:00.  Verkið var unnið í samstarfi við Háskóla Íslands.

Persónur og leikendur:
Stína: Halldóra Rósa Björnsdóttir
Anna: Elva Ósk Ólafsdóttir
Eiginmaður Stínu: Gunnar Hansson
Dóttir Stínu: Kristín Erna Úlfarsdóttir
Jakobína: Þórey Sigþórsdóttir
Saloma, kölluð Sala: Jakobína Sigurðardóttir

Hljóðvinnslu annaðist Einar Sigurðsson

Höfundur og leikstjóri: Þórey Sigþórsdóttir

 

 

Mynd með færslu
Þorgerður E. Sigurðardóttir
dagskrárgerðarmaður
Útvarpsleikhús