Kvenréttindafélag styður brjóstabyltingu

27.03.2015 - 23:53
Mynd með færslu
 Mynd: RÚV
Kvenréttindafélag Íslands hefur sent frá sér yfirlýsingu vegna baráttudags fyrir frelsun geirvörtunnar, #freethenipple, sem haldið var upp á í gær. Fram kemur í yfirlýsingunni að félagið styðji ungar feminískar konur í háskólum, menntaskólum og jafnvel grunnskólum landsins.

Byltingar sjálfsprottnar

Í yfirlýsingunni segir að byltingar séu í eðli sínu sjálfsprottnar, fólk taki höndum saman og krefjist breytinga í samfélaginu. Kvenréttindafélagið sé sprottið upp úr slíkri byltingu. Konur hafi risið á fætur og krafist þess að fá fullt aðgengi að stofnunum samfélagsins, að fá sjálfan kosningaréttinn.

Styðja konur og stelpur á öllum aldri

„Nú rúmlega 100 árum síðar sitjum við á kantinum og blásum eins fast og við getum í hvatningalúðrana, og hvetjum áfram byltingahetjurnar, feminískar konur í menntaskólum, háskólum og jafnvel grunnskólum landsins,“ segir í tilkynningunni. 

Lifa og hrærast í öðrum  heimi

Ungar konur eru sagðar lifa og hrærast í öðrum heimi sem formæður þeirra ættu erfitt með að ímynda sér, stafrænum heimi veraldarvefsins. „En ógnirnar sem þær takast á við eru þó gamalkunnugar og rótgrónar. Konur á veraldarvefnum þurfa að takast á við áreitni, við hótanir, við ofsóknir, við kynferðislegt ofbeldi.“

Kvenlíkaminn gengur enn kaupum og sölum

Í yfirlýsingunni segir að ein birtingarmynd þessa ofbeldis sé hrelli- eða hefndarklám, þegar ljósmyndum sem sýna einstaklinga nakta og/eða á kynferðislegan máta er dreift án samþykkis þess sem á myndinni er. „Í samfélaginu í dag, líkt og fyrir hundrað árum, ganga líkamar kvenna kaupum og sölum. Við búum enn í samfélagi þar sem konur eru markaðsvörur,“ skrifa kvenréttindakonur. 

Skref í átt að auknu kynfrelsi

Þær segja #freethenipple byltinguna skref í átt að auknu kynfrelsi, og í átt að því að konur taki yfirráðarétt yfir eigin líkama og neiti þeim sem vilji eigna sér þá, neiti því að í nekt kvenna sé falin skömm. Þær hafa trú á samtakamætti kvenna, segja að hann hafi gjörbreytt íslensku samfélagi síðastliðin hundrað ár og skapað íslenskum konum betri heim. Enn og aftur standi konur saman, nú á veraldarvefnum og krefjist þess að samfélagið virði yfirráðarétt kvenna yfir eigin líkama. „Að skömmin sem konur hafa dröslast með í gegnum aldirnar sé færð á sinn rétta stað, í faðm þeirra sem vilja eigna sér og misnota líkama annarra,“ segir í tilkynningunni. 

Mótlæti af hinu góða

Að lokum fullyrða kvenréttindafélagskonur að þær konur sem tekið hafi þátt í #freethenipple hreyfingunni muni finna fyrir ógnarkrafti feðraveldisins sem þær berjist á móti. Við því vill stjórn Kvenréttindafélagsins segja: „Ef þið finnið fyrir mótlætinu, þá getið verið fullvissar um að þið séuð að gera eitthvað rétt. Við berum í (kappklæddum) brjóstum okkar fullan stuðning við aðgerðir ykkar og hlökkum til að takast á við feðraveldið í nýrri mynd.