Keflavík sigraði KR á heimavelli
Keflavíkurkonur unnu KR í kvöld og eru efstar í deildinni
Heil umferð fór fram í úrvalsdeild kvenna í körfuknattleik í kvöld.
Snæfell vann nauman sigur á Fjölni 90-88 í Grafarvogi. Brittney Jones skoraði 38 stig fyrir Fjölni og tók 6 fráköst en Kieraah Marlow var með 32 stig og 11 fráköst fyrir Snæfell.
Valur sigraði Njarðvík 100-81 á heimavelli sínum á Hlíðarenda. Melissa Leichlitner skoraði 23 stig fyrir Val og Lacey Katrice Simpson 19 stig ásamt því að taka 18 fráköst en Lele Hardy var með 26 stig og 14 fráköst fyrir Njarðvík.
Haukar lögðu Hamar 72-66 á Ásvöllum í Hafnarfirði. Hope Elam skoraði 17 stig fyrir Haukar og tók 9 fráköst en Katherine Virginia Graham var atkvæðamest í liði Hamars með 22 stig og 10 fráköst.
Þá vann Keflavík góðan heimasigur á KR 70-56. Jaleesa Butler skoraði 21 stig og tók 22 fráköst fyrir Keflavík en Margrét Kara Sturludóttir var með 18 stig og 15 fráköst fyrir KR.
Nú þegar 21 umferð er lokið er Keflavík efst í deildinni með 34 stig og Njarðvík í öðru sæti með 30 stig. Haukar og KR eru með 24 stig og Snæfell í fimmta sæti með 20 stig. Valur er í sjötta sæti með 16 stig og Hamar og Fjölnir neðst í deildinni með 10 stig.
Ertu með athugasemd vegna fréttarinnar? Sendu á frettir@ruv.is
Tilkynna um bilaða upptöku
