Kattafló finnst hér á landi

12.02.2016 - 07:52
Mynd með færslu
 Mynd: Rúv
Kattafló hefur fundist á höfuðborgarsvæðinu, en flóin getur valdið bæði dýrum og mönnum miklum óþægindum og jafnvel veikindum. Kattafló er ekki landlæg hér á landi.

Í tilkynningu frá Matvælastofnuns segir að dýralæknar á Dýraspítalanum í Garðabæ hafi fengið grun um kattafló á ketti og sendu sýni til greiningar á Tilraunastöð Háskóla Íslands að Keldum, sem staðfesti gruninn. Haft hefur verið í samband við eiganda kattarins og  fyrirmæli gefin um ráðstafanir til að hindra að flærnar breiðist út. Haft verður samband við alla sem vitað er að hafa haft einhver tengsl við viðkomandi kött á undanförnum mánuðum. Kattaflóin getur borið með sér sýkla sem ekki hafa greinst í dýrum hér á landi og geta valdið veikindum í köttum og jafnframt borist í fólk. Það er því mikils um vert að koma í veg fyrir að hún nái fótfestu hér á landi segir Matvælastofnun.

Tilkynning Matvælastofnunar í heild:

Matvælastofnun hefur borist tilkynning um að kattafló hafi fundist á ketti á höfuðborgarsvæðinu en hún er ekki landlæg á Íslandi. Kattafló getur valdið bæði dýrum og mönnum miklum óþægindum og jafnvel veikindum. Matvælastofnun hvetur fólk til að vera á varðbergi gagnvart þessari óværu og leggur áherslu á að reynt verði að uppræta hana.

Í síðustu viku fengu dýralæknar á Dýraspítalanum í Garðabæ grun um kattafló á ketti og sendu sýni til greiningar á Tilraunastöð Háskóla Íslands að Keldum, sem staðfesti að um væri að ræða kattafló (Ctenocephalides felis). Matvælastofnun var tilkynnt um greininguna á mánudag í þessari viku og hefur haft samband við eiganda kattarins og gefið fyrirmæli um ráðstafanir til að hindra að flærnar breiðist út. Haft verður samband við alla sem vitað er að hafa haft einhver tengsl við viðkomandi kött á undanförnum mánuðum.

Kattafló hefur aðeins greinst í stökum tilfellum hér á landi, m.a. á hundum á árunum 1980 og 1984 og á innfluttum dýrum í einangrun árið 2012 (kanína) og árið 2013 (hundur). Í öllum tilvikum náðist að uppræta flóna. Vert er að vekja athygli á að kattafló er frábrugðin fuglafló (Ceratophyllus gallinae), sem er landlæg hér á landi. Fuglaflær geta ekki fjölgað sér á og lifað á köttum og hundum eins og kattaflóin. Dýrin geta þó borið fuglaflærnar í feldi sínum í skamman tíma og þá oft eftir að hafa komið nálægt hreiðrum eða fuglum á sumrin. Ekki er hægt að greina milli kattaflóa og fuglaflóa með berum augum, það þarf að gera í smásjá af fagfólki.

Kattaflóin getur valdið bæði dýrum og mönnum miklum óþægindum og jafnvel veikindum. Hún getur jafnframt borið með sér sýkla sem ekki hafa greinst í dýrum hér á landi, s.s. Rickettsia og Bartonella, sem geta valdið veikindum í köttum og jafnframt borist í fólk. Það er því mikils um vert að koma í veg fyrir að hún nái fótfestu hér á landi. Matvælastofnun hvetur því fólk til að vera á varðbergi og hafa samband við dýralækni ef það telur sig sjá flær á dýrum sínum. 

Ef dýrin klóra sér, sleikja eða bíta í húðina meira en venjulega er rétt að skoða feldinn vel. Flærnar eru dökkbrúnar, u.þ.b. 1-3 mm að stærð og eru því sýnilegar með berum augum. En stundum getur verið erfitt að koma auga á þær sjálfar og oft auðveldara að sjá flóaskítinn. Ráð er að setja hvítt handklæði undir dýrið og nudda feldinn eða kemba með flóakambi, ef svört korn falla úr feldinum er hugsanlegt að þau séu flóaskítur. Hafið samband við dýralækni ef grunur um flær vaknar. Dýrin þarf að meðhöndla og samhliða þarf að gera ráðstafanir á heimilinu til að uppræta flærnar. Egg flónna falla af dýrinu og klekjast út t.d. í teppum, húsgögnum og glufum í gólfi. Lirfurnar þrífast best við stofuhita og hátt rakastig. Lirfurnar púpa sig eftir nokkra daga og fullorðnar flær koma svo úr púpunum þegar aðstæður eru hentugar, s.s. þegar lifandi dýr eða manneskja er í hæfilegri nálægð.  

 

 

 


Deila frétt



Mynd með færslu
Kristján Sigurjónsson
Fréttastofa RÚV
12.02.2016 - 07:52