Játaði að koma sprengju fyrir

Lögregla segir að tilgangur mannsins hafi ekki verið að valda skaða, en hann hafi viljað koma ákveðnum skilaboðum á framfæri. Sprengjan hafi ekki verið til þess fallin að valda eyðileggingu eða hættu, enda hafi maðurinn staðið við hlið hennar þegar hún sprakk.

"Eins og fram hefur komið var maðurinn handtekinn í gær en við húsleit á heimili hans var lagt hald á ýmsan búnað sem tengist áðurnefndu máli. Þá var bíll mannsins sömuleiðis tekinn í vörslu lögreglu en ökutækið er sömu gerðar og lýst var eftir í fjölmiðlum. Fjölmargir voru kallaðir til skýrslutöku í þágu rannsóknarinnar en unnið var sleitulaust að málinu frá því að það kom upp á þriðjudaginn í síðustu viku enda var það litið mjög alvarlegum augum hjá lögreglu," segir í tilkynningu frá lögreglu.

Ertu með athugasemd vegna fréttarinnar? Sendu á frettir@ruv.is