Ísland mætir Frökkum í dag
Ísland mætir Frökkum kl.15.10 í dag
Ísland mætir Frökkum í dag kl.15.10 í lokaumferð milliriðils tvö á Evrópumótinu í handknattleik í Serbíu. Hvorugt lið á möguleika á að komast í undanúrslit keppninnar. Leikur liðanna er í beinni útsendingu á RÚV og lýst beint á Rás 2.
Spánverjar eru efstir í riðlinum með sjö stig og Króatar hafa sex stig en bæði liðin eru örugg áfram í undanúrslit. Slóvenar hafa fjögur stig og Ungverjar þrjú stig en Ísland og Frakkland eru neðst með tvö stig.
Heldur meiri spenna er í undanriðli eitt þar sem Serbía hefur eitt liða tryggt sér sæti í undanúrslitum en liðið er efst í riðlinum með sjö stig. Þjóðverjar koma næstir með fimm stig og Danir með fjögur stig. Makedóníumenn og Pólverjar hafa svo þrjú stig en Svíar reka lestina með tvö stig.
Keppni í báðum milliriðlum lýkur í dag og eru leikirnir eftirfarandi:
15.10 Frakkland – Ísland : Milliriðill tvö
15.15 Pólland – Þýskaland : Milliriðill eitt
17.10 Spánn – Slóvenía : Milliriðill tvö
17.15 Danmörk – Svíþjóð : Milliriðill eitt
19.10 Ungverjaland – Króatía : Milliriðill tvö
19.15 Serbía – Makedónía : Milliriðill eitt
Ertu með athugasemd vegna fréttarinnar? Sendu á frettir@ruv.is
Tilkynna um bilaða upptöku
