Ísfirðingar lögðu Fjölbrautaskóla Vesturlands

18.01.2016 - 23:24
Mynd með færslu
Lið Menntaskólans á Ísafirði eftir sigurinn á Fjölbrautaskóla Vesturlands.  Mynd: Rúv
Menntaskólinn við Hamrahlíð, Fjölbrautaskóli Suðurnesja, Menntaskólinn á Ísafirði og Kvennaskólinn í Reykjavík eru komnir áfram í sjónvarpshluta Gettu betur eftir sigur í viðureignum sínum í kvöld þegar önnur umferð keppninnar fór fram á Rás 2.

Þetta er í fyrsta sinn sem Ísfirðingar komast svo langt í keppninni en lið þeirra hafði betur gegn liði Fjölbrautaskóla Vesturlands í æsispennandi keppni. Aðeins munaði einu stigi á liðunum þegar yfir lauk. Lið MH sigraði lið Flensborgarskóla 32 - 15, FS hafði betur gegn Framhaldsskólanum á Laugum 20 - 13 og lið Kvennaskólans sigraði lið Fjölbrautaskólans í Breiðholti með 27 stigum gegn 15. 

Næstu keppnir eru á miðvikudag þegar MA mætir Verzlunarskólanum, Fjölbrautaskólinn í Garðabæ etur kappi við Menntaskólann á Laugavatni, Framhaldsskólinn í Austur-Skaftafellssýslu mætir Menntaskólanum við Sund og lokaviðureign miðvikudagsins og annarrar umferðar verður á milli Menntaskólans í Reykjavík og Borgarholtsskóla. 

Sjónvarpshluti keppninnar hefst föstudaginn 5. febrúar.


Deila frétt



Mynd með færslu
Ásgeir Tómasson
Fréttastofa RÚV
gettu betur 2016
18.01.2016 - 23:24