„Höfum trú á þessum aðgerðum"

27.01.2016 - 17:14
Mynd með færslu
 Mynd: Sighvatur Jónsson  -  RÚV
„Við höfum trú á þessum aðgerðum og teljum að þær skili árangri. En þetta er langtímaverkefni. Það er ekki víst að við sjáum fyrir endann á þessu næsta áratuginn en við vonum það“, segir Sigurður Áss Grétarsson framkvæmdastjóri Siglingasviðs Vegagerðarinnar. Belgískt dýpkunarskip kemur til að dýpka fyrir framan Landeyjahöfn um miðjan febrúar.

Sigurður Áss segir að ekki sé ýkja mikill sandur í Landeyjahöfn nú, en sandur hafi safnast fyrir framan hana. Á síðasta ári var dælt um 750 þúsund rúmmetrum af hafsbotni í og við höfnina fyrir um 520 milljónir króna, sem er meira en nokkru sinni. Stórt dæluskip frá belgíska fyrirtækinu Jan de Nuul dældi utar en áður hefur verið gert „Við teljum að það hafi skilað sér. Það hefur mun minni sandur safnast að höfninni nú en áður, ef miðað er við þá austlægu öldu sem hefur verið ríkjandi. Við eigum eftir að vinna úr miklu af gögnum til þess að geta staðfest þetta með óyggjandi hætti, en við eigum næg gögn til að vinna úr“, segir hann. Belgíska fyrirtækið mun sinna dýpkun við höfnina næstu þrjú ár samkvæmt tilboði, en íslensk dýpkunarskip munu áfram dýpka við höfnina á haustin.

„Langtímaverkefni“

„Það verður að segjast eins og er, að miðað við reynslu af sandhöfnum í heiminum þá næst árangur ekki hratt“, segir Sigurður Áss. Hann segir að margs konar aðgerðir til að bæta nýtingu hafnarinnar séu og hafi verið til skoðunar. Landbrot hafi verið úr ströndinni í kringum höfnina, sem sé eitt af því sem vonast var til við meiri dælingu lengra frá höfninni. „Við höfum rannsakað ýmis konar úrræði sem geta gert gagn, en við þurfum að rannsaka þau mun meira til þess að geta lagt til svo kostnaðarsamar aðgerðir sem þetta eru“. Eitt þessara úrræða er að færa ós Markarfljóts. „Þá yrði ósinn kannski 400 metrum austar. Það er ekki mjög dýr framkvæmd í þessu samhengi og myndi bæta stöðuna á haustin. En það myndi ekki þýða neina byltingu“.


Deila frétt



Samúel Örn Erlingsson
Fréttastofa RÚV
27.01.2016 - 17:14