Hluta silfursins haldið eftir

P&H Jewellers auglýsti nýlega í blöðum og hvatti fólk til að koma með gull og skartgripi til mats og mögulegrar sölu en fyrirtækið bræðir gullið og silfrið í stangir sem það síðan selur. Forngripi, eldri en hundrað ára, má ekki flytja úr landi án formlegs leyfis safnaráðs og er því ætlað að sporna gegn ólöglegum útflutningi menningarverðmæta. Sérfræðingar ráðsins hittu fulltrúa fyrirtækisins á Grand Hóteli í morgun og fóru yfir skartgripina sem fulltrúi fyrirtækisins hafði keypt. 

„Það sem við sjáum hér er til dæmis búningasilfur, víravirki, sem tilheyrir okkar menningararfi og við teljum að þurfi að fjalla sérstaklega um í safnaráði áður en er farið með það úr landi. Sérstaklega þegar við vitum að stendur til að bræða þetta, eyðileggja. Það sem við erum með hér eru armbönd, eyrnalokkar og nælur sem eru svokallað íslenskt víravirki úr silfri, sem tengist okkar menningarsögu og handverkssögu,“ segir Margrét Hallgrímsdóttir, formaður safnaráðs.

„Það er kannski erfitt að segja nákvæmlega til um hvað þetta er gamalt. Þetta er frá síðustu öld,“ segir Margrét. „Við teljum ástæðu til að fjalla um þetta sérstaklega. Ég spyr mig hvort það sé ekki eitthvað sem við þurfum að hugleiða Íslendingar hvort það sé þess virði að selja fjölskylduarfinn, fjölskyldusilfrið, það sem tilheyrði ömmu eða langömmu, bara út frá þyngd málmsins.“

Ertu með athugasemd vegna fréttarinnar? Sendu á frettir@ruv.is