Hæpið að reikna út þingsæti

Ef niðurstöður skoðanakönnunar Fréttablaðsins og Stöðvar tvö eru fyllilegar marktækar, þá eru að gerast pólitísk stórtíðindi á Íslandi. Þar er fyrst til að taka að fylgi samfylkingarinnar er hrunið og mælist nú aðeins tólf komma þrjú prósent og er Samfylkingin þar með orðin minni en Framsóknarflokkurinn. Samstaða, nýstofnaður flokkur undir forustu Lilju Mósesdóttur mælist með tuttugu og eitt komma þrjú prósent, sem er meira en fylgi beggja stjórnarflokkanna til samans. Fylgi Vinstri hreyfingarinnar Græns framboðs er komið niður í átta prósent svo varla er ofmælt að ef marka má könnunina er vinstri vængur stjórnmálanna á íslandi nánast í rúst. Sjálfstæðisflokkurinn er langt yfir kjörfylgi sínu en hefur fallið úr um það bil fimmtíu prósentum niður í þrjátíu og fimm síðan í desember. Ef fylgistölurnar eru umreiknaðar yfir í þingsæti, og gert ráð fyrir að þessi yrðu úrslit kosninga, þá kemur í ljós að fræðilega séð væri hægt að mynda ríkisstjórn með meirihluta á þingi án Sjálfstæðisflokks og Samfylkingar. En þá vaknar spurningin, hversu víðtækar ályktanir er réttmætt að draga af skoðanakönnun, þar sem aðeins rúmur helmingur þeirra sem spurðir eru gefa upp afstöðu til einstaks framboðs. Spegillinn spurði Rúnar Vilhjálmsson prófessor í félagsfræði við Háskóla Íslands.

Ertu með athugasemd vegna fréttarinnar? Sendu á frettir@ruv.is