Gingrich á undir högg að sækja
Fyrst birt: 28.01.2012 02:21, Síðast uppfært: 28.01.2012 14:00
Gingrich og Romney. Barátta þeirra í Flórída er grimmari en ætla mætti af þessari mynd.
Newt Gingrich, fyrrverandi forseti Fulltrúadeildar Bandaríkjaþings, rær lífróður í kosningabaráttunni fyrir prófkjör repúblikana í Flórída á þriðjudag. Þrjár kannanir í fyrradag, og tvær í gær, benda til þess að hann muni bíða ósigur fyrir Mitt Romney, fyrrverandi ríkisstjóra Massachusetts.
Munurinn verði allt að níu prósentustigum. Romney þótti standa sig betur en Gingrich í kappræðum repúblikana í ríkinu í fyrradag.
Gingrich bregst við mótlætinu með æ harðari árásum á Romney í sjónvarpsauglýsingum. Í þeirri síðustu spyr þulur: Hvers konar maður lýgur, blekkir og svíkur til þess eins að ná kjöri? Og svarar: Þess háttar maður er Mitt Romney.
Ertu með athugasemd vegna fréttarinnar? Sendu á frettir@ruv.is
Flokkar
ErlentTilkynna um bilaða upptöku
