Gettu betur byrjað á ný

Spurningakeppni framhaldsskólanna Gettu betur hófst á Rás 2 í kvöld. Þrjátíu ár eru síðan keppnin hóf fyrst göngu sína í sjónvarpi. 29 skólar sendu inn tilkynningu um þátttöku að þessu sinni en átta lið fara áfram í lokakeppnina sem hefst á RÚV 5.febrúar nk.

 

 

Þrjár viðureignir fóru fram á þessu fyrsta kvöldi fyrri umferðar keppninnar á Rás 2. Leikar lyktuðu þannig að lið Kvennaskólans sigraði lið Menntaskólans á Egilsstöðum 37 - 23, lið Fjölbrautaskóla Vesturlands hafði betur gegn liði Fjölbrautaskóla Suðurlands 29 - 23 og lið Framhaldsskólans að Laugum lagði lið Tækniskólans með 25 stigum gegn 21 stigi. Áður en að til keppni kom dró lið Landbúnaðarháskólans sig úr keppninni en liðið hafði dregist á móti lið Menntaskólans á Akureyri. 

Það eru því lið Kvennaskólans, FVA og Framhaldsskólans að Laugum sem eru komin áfram í 2.umferð keppninnar á Rás 2 ásamt liði Menntaskólans á Akureyri og Menntaskólans í Reykjavík sem situr hjá í fyrri umferð á Rás 2.

Keppnin heldur áfram á Rás 2 á morgun, þriðjudag, en þá eigast við lið MS og Framhaldsskólans á Húsavík, FÁ og MH, Versló og Flensborg og FG og FMOS. Útsending hefst kl. 19.20

Spurningahöfundar og dómarar eru þau Bryndís Björgvinsdóttir og Steinþór Helgi Arnsteinsson og þeim til aðstoðar er Björn Teitsson. Spyrill er Björn Bragi Arnarson. Umsjónarmaður Gettu betur og stjórnandi útsendingar er Elín Sveinsdóttir.

 

 


Deila frétt



Elín Sveinsdóttir
dagskrárgerðarmaður
Gettu betur Rás 2
Gettu betur