6. þáttur: Karrý
Ég ákvað að elda karrý í öllum litum í þessum þætti. Við byrjum á grænum kjúklingarétti og eldum svo Lamb-Vindaloo sem er einn af mínum uppáhaldsréttum, enda stútfullur af chili. Í lokin gerum við svo gulan kartöflurétt eða Aloo-dam curry.
Þá er komið að því að búa til rétti sem Englendingar kalla curry eða karrý. Orðið curry er sagt koma af orðinu "Kari" á Tamil sem þýðir sósa sem hefur verið elduð. Það er semsagt matargerð þar sem grænmeti, fiskur eða kjöt er eldað og borið fram í sósu sem búin er til úr allskyns kryddum. Til er Thai-curry, Malasian-curry, fish-curry og svo framvegis.
Á vesturlöndum hafa karrý-in þróast þannig að mörg þeirra eru afar svipuð á bragðið en mun fleiri krydd og bragðtegundir eru notaðar á Indlandi. Indverski maturinn er undir miklum áhrifum frá öðrum löndum meðal annars Portúgal, Monglíu og Bretlandi þar sem alltaf þarf að hafa sósu með öllu. Með Englendingunum fór inverski maturinn að þróast út um allan heim og kannski fundu þeir sinn eigin stíl. Indverskt karrý byggist upp á einu aðalhráefni og svo einhverskonar sósu. í sósuna notum við soð í grunninn í staðinn fyrir hveiti, smjör og rjóma eins og oftast er gert á vesturlöndum. Einnig eldar maður yfirleitt kjúklinginn, fiskinn eða kjötið með öllum beinunum til að fá sem mest bragð af safanum. Síðan þarf alltaf að þykkja sósuna og til þess getum við t.d. notað lauk, kókosmjólk, fræ eða hnetur eða eitthvað sem bætir bragðið. Hveiti er aldrei notað til að þykkja sósur í indverskri matargerð því það er ekkert bragð af því.
Það er svolítið magnað að það sé oftast verið að notast við sömu kryddin þegar maður býr til curry en það þarf mjög lítið til að breyta bragðinu algörlega. Bara með því að breyta einu hráefni eða setja kryddin í mismunandi hlutföllum eða bæta þeim við á mismunandi stigum eldamennskunnar breytist bragðið almennilega. Í indverskri matargerð er notað ákveðið krydd og hráefni til þess að ná ákveðnum lit eða gera réttinn sérstaklega litríkan, meira að segja stundum með aðstoð litarefna. Við gerum það ekki en náum samt með hjálp krydda ágætis áferð og útliti. Einnig snýst eldamennskan um jafnvægið milli þess sæta og sterka eins og chili og hunangs eða milli þess súra og sæta eins og með jógúrti og döðlum. Þannig má endalaust leika sér með indverskum mat.
Það er talað um að karrý geti verið ávanabindandi. Allavega virðist það örva bragðlaukana og gefa ákveðið "kick" sem við fáum ekki eftir að borða íslenskan mat, sem er náttúrulega aðeins mildari. Þegar manni er farið að þykja karrý gott vill maður hafa það aðeins sterkara næst. Ég held því líka fram að vegna kuldans geti heitt litríkt karrý hjálpað manni að halda heilsunni góðri.
Ertu með athugasemd vegna fréttarinnar? Sendu á frettir@ruv.is
Tilkynna um bilaða upptöku
