Fleiri og stærri geitungabú en áður

16.07.2017 - 14:45
„Þetta er á stærð við barnshöfuð, ég held að þau gerist varla stærri. Við erum að tala um bú sem geta innihaldið svona 800-850 stykki,“ segir Steinar Smári Guðbergsson meindýraeyðir. Geitungatímabilið er nú hafið en geitungarnir verða viðskotaillir undir lok sumars þegar drottningin er dauð.

Aðeins verið stunginn einu sinni

Geitungadrottning, fædd sumarið áður, byggir geitungabúið upp og hvert bú endist aðeins eitt sumar.  „Hvert bú er einnota, þetta er bara eins og einnota vettlingur,“ segir Steinar. Þegar drottningin vaknar úr dvala að vori hefst hún handa við að finna hentugan stað og efni fyrir nýtt bú. Í það notar hún fúa úr gömlum spýtum eða föllnum trjágreinum, og eru búin því gjarnan staðsett nálægt fúnum viði. „Hún skrælir þetta í raun af spýtunni. Það er hægt að sjá það vel á spýtunni, eins og hún sé rispuð.“

Mynd með færslu
 Mynd: S. Rae  -  Flickr
Dolichovespula norwegica, eða trjágeitungur

„Ég er með svona spes græju, sem er með nál á endanum sem ég sting inn í búið og fylli af eitri, og þeir deyja allir samstundis inni í búinu.“ Steinar hefur marga fjöruna sopið í þessum bransa en hefur aðeins einu sinni verið stunginn. „Ég hef heyrt að margir meindýraeyðar séu stungnir ansi oft en ég held að þeir séu bara háðir því,“ segir Steinar og bætir við að hann kunni á geitungana. „En ég segi ykkur það ekki, það er atvinnuleyndarmál.“

Hringt í meindýraeyði þegar ekki er hægt að grilla

Steinar segir að holugeitungurinn sé mun viðsjárverðari en frændi hans, trjágeitungurinn. „Ég myndi frekar vilja hafa tíu trjágeitungabú í garðinum en eitt holugeitungabú“. Erfitt getur verið að sjá muninn á þessum tveimur tegundum en holugeitungurinn er ívið minni en trjágeitungurinn og er alla jafna seinna á ferðinni á sumrin. Einfaldara er að greina muninn á búum þessara tveggja tegunda en bú trjágeitunganna eru meira kúlulaga. „Á meðan holugeitungsbúin eru eins og hangandi gluggatjöld og gulari á litinn,“ segir Steinar.

Mynd með færslu
 Mynd: Rúnar Snær Reynisson  -  RÚV
Geitungabú

Steinar hefur séð geitungabú á ótrúlegustu stöðum, m.a. ofan í stígvéli og í klofinu á garðálfi. Hann segir algengt að fólk bíði lengi með að hringja í meindýraeyði til að fjarlægja geitungabú úr garðinum. „Þangað til að það er komið mjög nálægt grillinu, eða á grillið. Þá fyrst er farið að hringja í meindýraeyði“. Að sögn Steinars fer geitungabúum fjölgandi og þau virðast verða stærri með hverju árinu. „Þetta er á stærð við barnshöfuð, ég held að þau gerist varla stærri. Við erum að tala um bú sem geta innihaldið svona 800-850 stykki,“

Rætt var við Steinar Smára Guðbergsson meindýraeyði um geitunga í Laugardagsmorgnum á Rás 2.

Mynd með færslu
Atli Þór Ægisson
vefritstjórn
Laugardagsmorgnar
Þessi þáttur er í hlaðvarpi