Fjölskylduleikritið Ljósberarnir

24.03.2016 - 15:00
Mynd með færslu
 Mynd: RÚV
Páskafríið er hafið og Freyju líst illa á að verja því með nágrannastráknum Ottó, en þegar Ottó fær leynileg skilaboð bókstaflega í hausinn upphefst æsileg atburðarás. Ljósberarnir er glænýtt útvarpsleikrit fyrir alla fjölskylduna sem flutt er á Rás 1 um páskana. Hér má hlusta á verkið í heild sinni.

Freyja er tíu ára áhugakona um ráðgátur og dularfull mál sem býr í Laugarneshverfinu. Henni líst vægast sagt illa á að hafa Ottó, strákinn úr kjallaranum, hangandi yfir sér alla páskana eins og foreldrar þeirra hafa lagt á ráðin um. Páskafríið tekur hins vegar vægast sagt óvænta stefnu þegar krakkarnir finna fyrir tilviljun leynileg skilaboð á dulmáli og taka höndum saman um að ráða skilaboðin. Þau komast að því að í Laugardalnum er eitthvað magnað á seyði og böndin berast að þvottalaugunum þar sem mamma Freyju stjórnar fornleifauppgreftri.

Saman mynda Freyja og Ottó öflugt tvíeyki við rannsókn málsins - hún með sinn ódrepandi ráðgátuáhuga og Ottó með mikla þekkingu á jurtum og dýralífi. Inn í hið leyndardómsfulla mál fléttast meðal annars úrillur garðyrkjumaður í Grasagarðinum, persónur úr fjarlægri fortíð, fugl sem þverbrýtur reglur Borgarbókasafnsins og stórskrítinn nágranni sem gæti verið versti orgelleikari landsins.

Ljósberarnir er fyrsta verk Sölku Guðmundsdóttur fyrir Útvarpsleikhúsið en hún hefur skrifað talsvert af sviðsverkum og starfar um þessar mundir sem leikskáld Borgarleikhússins. Salka hlaut nýverið styrk úr Leikritunarsjóði Þorsteins Ö. Stephensen fyrir útvarpsverk í vinnslu. Hún hefur verið einlægur aðdáandi Útvarpsleikhússins frá unga aldri og á góðar minningar um að flatmaga fyrir framan lítið, rautt útvarp á laugardagsmorgnum fyrir margt löngu.

Persónur og leikendur:

Freyja: Andrea Marín Magnúsdóttir.
Ottó: Pétur Steinn Atlason.
Sigrún, mamma Ottós: Katla Margrét Þorgeirsdóttir.
Bryndís, mamma Freyju: Edda Björg Eyjólfsdóttir.
Emil, pabbi Freyju: Erling Jóhannesson.
Jarek Darri, bróðir Freyju: Arnmundur Ernst Bachmann.
Móeiður jarðfræðingur: Margrét Helga Jóhannsdóttir.
Árelíus garðyrkjumaður: Pétur Einarsson.
Mundi fuglaskoðari: Þorsteinn Bachmann.
Selma bókasafnsfræðingur: Aðalbjörg Árnadóttir.
Búi fornleifafræðingur: Hannes Óli Ágústsson.
Rósrún: Katrín Halldóra Sigurðardóttir.
Fréttakona: Þórdís Arnljótsdóttir.
Öryggisvörður og bókasafnsgestur: Salka Guðmundsdóttir.


Deila frétt



Útvarpsleikhús
24.03.2016 - 15:00