Enn óvissa hjá tónlistarskólum

13.01.2016 - 22:23
Mynd með færslu
 Mynd: Landinn  -  RÚV
Tónlistarskólar á framhaldsstigi í Reykjavík hafa verið í óvissu lengi um hvort þeir eigi fyrir launum um mánaðamótin. Formaður Samtaka tónlistarskóla í Reykjavík segir ráðamenn vísa hver á annan. Reykjavíkurborg undirbýr aðgerðir sem fleyta skólunum yfir þetta skólaár.

Samkomulag um eflingu tónlistarnáms var gert milli ríkisins og sveitarfélaganna í maí 2011. Með því átti að efla framhaldsstigið og söngnámi á mið- og framhaldsstigi. Það hefur ekki verið raunin því rekstrarhalli skólanna sem kenna á framhaldsstigi hefur sífellt aukist á þessum tæpu fimm árum vegna ágreinings um túlkun samningsins.

„Við erum í raun bara að fá 2/3 af kostnaði sem hlýst af nemendunum greiddan. Við eigum lögum samkvæmt að fá 100% af kennslukostnaði,“ segir Þórunn Guðmundsdóttir formaður Samtaka tónlistarskóla í Reykjavík.

Þetta gerir reksturinn erfiðan. „Við veltum því fyrir okkur fyrir hver einustu mánaðamót hvort við eigum fyrir laununum. Hingað til hefur það gengið.“

Þórunn segir ráðamenn jákvæða í tali en árangur hefur verið lítill. „Það er eiginlega sama hvert við förum, hvort sem það er hjá ríki eða borg, það eru alir sem vísa á hinn. Það eru allir sammál aum að þetta er ófremdarástand, hvefur gengið allt of lengi svona, en hinir eiga að gera eitthvað í því.“

En nú er vonast til að það sé að breytast. Alþingi samþykkti fyrir jól að setja 60 milljónir í eflingu tónlistarnáms. Við það bætast 30 milljónir frá jöfnunarsjóði sveitarfélaga og 90 milljónir frá Reykjavíkurborg. Í minnisblaði frá sviðsstjóra skóla- og frístundasviðs kemur fram að stefnt sé að því að greiða fjármunina út fyrir næstu mánaðamót. Þetta leysir fjárhaginn á þessu skólaári.

Þá hefur fréttastofa heimildir fyrir því að viðræður standi yfir milli sveitafélaga og ríkisins um hvernig haga á þessum málum til lengri tíma. Eftir því bíða tónlistarskólarnir - og vilja vera með í ráðum. „Það hafa ýmis mistök verið gerð, vil ég meina, vegna þess að það hefur ekki verið talað við okkur,“ segir Þórunn.


Deila frétt



Mynd með færslu
Hallgrímur Indriðason
Fréttastofa RÚV
13.01.2016 - 22:23