Enn gangi hægt að útskrifa sjúklinga

16.01.2016 - 08:59
Mynd með færslu
 Mynd: RÚV
Páll Matthíasson, forstjóri Landspítalans, segir að þrátt fyrir að allir leggist á eitt þá gangi áfram hægt að útskrifa suma sjúklinga sem fengið hafa fulla meðhöndlun á sjúkrahúsinu.

Í forstjórapistli sínum á vefsíðu spítalans segir hann að áfram sé mikið álag á öllum deildum. Útskriftarvandinn gildi einkum um þá sem fengið hafi færni- og heilsumat og þá sem bíði endurhæfingar. Afar mikilvægt sé að fólkið komist sem fyrst í viðeigandi þjónustu. Hana sé ekki að fá á bráðadeildum Landspítala þar sem tugir einstaklinga bíði. Staðan sé ekki viðunandi.

Páll segir að spítalinn vilji að minnsta kosti geta boðið þessum hópi þjónustu á borð við þá sem veitt sé þeim einstaklingum sem bíði hjúkrunarrýmis á biðdeildinni á Vífilsstöðum. Hann fagnar fréttum af uppbyggingu hjúkrunarheimila samhliða viðræðum við velferðarráðuneytið um úrlausnir til skemmri tíma. Hann vonast til þess að þær lausnir verði kynntar fljótlega. 


Deila frétt



Ásrún Brynja Ingvarsdóttir
Fréttastofa RÚV
16.01.2016 - 08:59