Eðlilegast að útkljá deilur á aðalfundi

03.03.2016 - 13:38
Mynd með færslu
 Mynd: 360°  -  ja.is
Félagsfundur Blindrafélagsins ákvað í gærkvöld að eðlilegast sé að útkljá deilur í stjórn félagsins á aðalfundi þess síðar í mánuðinum. Tímabært sé að deilum í tengslum við vantraust stjórnar félagsins á Bergvin Oddsson, formann þess, linni.

Stjórn Blindrafélagsins lýsti vantrausti á Bergvin á fundi í lok september í fyrra vegna trúnaðarbrests. Skipuð var sannleiksnefnd til að komast til botns í því hvort eitthvað væri hæft í ásökunum á hendur Bergvin, sem sagður var hafa nýtt sér vettvang félagsins til að véla ungan félagsmann til að leggja til sparifé sitt í fasteignabrask honum tengt.  Á fundinum í gærkvöld lögðu fimmtán félagsmenn fram áskorun um að vantraust á Bergvin yrði dregið til baka. Þetta var í annað sinn sem þetta var lagt til. Félagsfundur vísaði tillögu sama efnis frá 10. febrúar síðastliðinn með 77 prósentum greiddra atkvæða.

Í ályktun fundarins í gærkvöld kemur fram að formaðurinn hafi beðið félagsmenn afsökunar á mistökum sínum og stjórnin tekið undir með sannleiksnefndinni um að margt hefði mátt betur fara í vinnubrögðum hennar og samskiptum við formanninn og baðst stjórnin afsökunar á því á fundinum. Í ályktuninni segir að það þjóni ekki hagsmunum Blindrafélagsins að útkljá deilurnar á fundinum með því að taka afstöðu með öðrum hvorum deiluaðila. Eðlilegast sé að útkljá málið þar í kosningu til næstu stjórnar félagsins. Aðalfundur félagsins verður 19. mars.

 

 


Deila frétt



Ásrún Brynja Ingvarsdóttir
Fréttastofa RÚV
03.03.2016 - 13:38