Dómur í máli Landsbankamanna í dag

Sigurjón Árnason og Sigurður G. Guðjónsson fyrir utan Hæstarétt eftir málflutning í allsherjarmarkaðsmisnotkunarmáli Landsbankans.
 Mynd: Rúnar Ingi Garðarsson  -  RÚV
Hæstiréttur kveður klukkan þrjú upp dóm sinn í máli sérstaks saksóknara gegn Sigurjóni Árnasyni, fyrrverandi Landsbankastjóra, og þremur undirmönnum hans.

Sigurjón bankastjóri, Ívar Guðjónsson, fyrrverandi yfirmaður deildar eigin viðskipta Landsbankans, og Júlíus Steinar Heiðarsson og Sindri Sveinsson, fyrrverandi starfsmenn deildarinnar, eru sakaðir um allsherjarmarkaðsmisnotkun, að hafa haldið uppi hlutabréfaverði í bankanum með gríðarmiklum kaupum á hlutabréfum bankans í tæpt ár fyrir hrun.

Allir nema Sindri voru dæmdir í héraðsdómi, en saksóknari krafðist þess í málflutningi í Hæstarétti að allir yrðu dæmdir og refsing þeirra þyngd. Til greina kæmi að dæma Sigurjón bankastjóra í meira en sex ára fangelsi, en hann hefur þegar hlotið þungan dóm í Hæstarétti fyrir önnur brot.

Sérstakur saksóknari ákærði í mars 2013 sex Landsbankamenn, en dómari ákvað að skipta málsmeðferðinni í tvennt. Í október í fyrra dæmdi Hæstiréttur í fyrri hlutanum, sem oft er kenndur er við félagið Imon. Sigurjón hlaut þar þriggja og hálfs árs dóm, fyrir markaðsmisnotkun og umboðssvik við sölu á eigin hlutabréfum í bankanum utan kauphallar. Elín Sigfúsdóttir, fyrrverandi framkvæmdastjóri fyrirtækjasviðs, fékk 18 mánaða dóm fyrir sinn þátt í viðskiptunum, og Steinþór Gunnarsson, fyrrverandi forstöðumaður verðbréfamiðlunar, var dæmdur í níu mánaða fangelsi.

 


Deila frétt