Dagsektir geta reynst gagnlitlar
Dagsektir geta reynst gagnslítið úrræði gagnvart eigendum húsa í niðurníðslu ef þeir stefna í þrot, segir varaformaður skipulagsráðs borgarinnar. Rúmlega sex milljóna króna dagsektir höfðu engin áhrif í þá átt að fá eigendur húss við Baldursgötu til að bæta úr ömurlegu ástandi þess.
Húsið hefur verið mannlaust hreysi árum saman. Þar átti að byggja nýtt, en ekkert varð úr framkvæmdum. Nágrannar eru langþreyttir, en húsið hefur staðið autt í ríflega áratug eftir að þar fundust veggjatítlur. Fyrir áramót var húsið selt, nýir eigendur stefna á framkvæmdir sem ekkert bólar á enn.
Hjálmar Sveinsson, varaformaður skipulagsráðs, segir að í sumum tilfellum reynist dagsektir gagnslítið úrræði. Það sé þegar eigendur húsa eru gjaldþrota og það sé enginn viðtakandi að dagsektunum. Og fyrir þá sem eru gjaldþrota sé það oft þannig að svona sektir skipti engu máli lengur. Hinsvegar hlaðist sektirnar upp á eignina engu að síður.
Hjálmar segir borgina ekki alveg ráðalausa gagnvart svona tilfellum, og tekur sem dæmi að stafi hætta af húsinu geti borgin gripið til aðgerða. Og ef sektir hlaðist upp geti það endað með að borgin eignist viðkomandi hús. En það sé alveg rétt að af því að við búum í frjálsu lýðræðsiríki þá hafi yfirvöld takamarkaða heimild með ráðstöfun eigna í einkaeign.
Í þessu tilfelli var húsið búið að standa mannlaust í 10 ár, var aldrei hægt að gera neitt? Hjálmar segist ekki hvernig staðið var að málum áður en nýr meirihluti tók við fyrir 2 árum, en í byrjun árs 2011 hafi verið gefin út yfirlýsing um að dagsektum yrði beitt. Áður hafi dagsektirnar ekki verið innheimtar, segir Hjálmar. Þetta hafi borið árangur meðal annars á Hverfisgötu, Skólavörðustíg og í Þingholtstræti.
Ertu með athugasemd vegna fréttarinnar? Sendu á frettir@ruv.is
