Bið í þinglýsingu: „Ekki boðlegt þjónustustig“

11.08.2016 - 13:49
Mynd með færslu
 Mynd: RUV
Rúmlega þriggja vikna bið er eftir þinglýsingum hjá Sýslumanninum á höfuðborgarsvæðinu. Formaður Félags fasteignasala segir þetta kalla á mikil fjárútlát hjá íbúðakaupendum. Embættið nái ekki að sinna lögbundnu hlutverki sínu. Sýslumaður segir ýmsar ástæður fyrir töfinni, mikið safnaðist upp í verkfallinu í fyrra, skjölum hafi fjölgað mikið og fjárveitingar leyfi ekki að ráðið sé í sumarafleysingar.

Mikill fjöldi skjala hefur safnast upp hjá Sýslumanninum á höfuðborgarsvæðinu og töluverðar tafir verið á þinglýsingum alveg frá verkfalli félagsmanna BHM í fyrra. Kaupsamningum og lánaskjölum var ekki þinglýst meðan á verkfallinu stóð. 

Nærri 30% fjölgun í ár

Þórólfur Halldórsson, sýslumaður á höfuðborgarsvæðinu, segir að embættið hafi lent í ákveðnum hremmingum. „Það byrjaði með verkfallinu í fyrra. BHM notaði lögfræðinga hjá sýslumanninum á höfuðborgarsvæðinu sem sitt vopn og það var erfitt hjá embættinu að draga þennan vagn því hvergi annars staðar voru lögfræðingar í verkfalli. Þar byrja vandræðin. Þetta þýddi að við fórum dálítið fram úr fjárhagsáætlun. Síðan gerist það að það er töluvert mikil fjölgun skjala. Milli áranna 2014 og 2015 hefur fjölgað um 10%. Fjölgunin hefur verið hátt í 30% miðað við fyrstu sex mánuði ársins. Fjárveitingar leyfa ekki að það sé ráðið í sumarafleysingar. Það hefur haft það í för með sér að það hefur lengst þessi tími að þinglýsa á höfuðborgarsvæðinu,“ segir Þórólfur. 

„Ekki boðlegt þjónustustig“

Félag fasteignasala hefur fundað, bæði með sýslumanni og fulltrúum innanríkisráðuneytisins. Sýslumanni vanti fjárheimildir og ráðuneytinu sé kunnugt um ástandið en ekkert bóli á aðgerðum. „Staðan er slæm. Það að þurfa að bíða í allt að þrjár vikur eftir skjölum veldur ýmiskonar vandamálum. Bæði er þetta hugsanlega fjárhagslegt, fólk lendir í að geta ekki greitt greiðslur á réttum tíma, þetta tefur hugsanlega afhendingar og er auðvitað bara ekki boðlegt þjónustustig,“ segir Kjartan Hallgeirsson, formaður Félags fasteignasala. 

Embættið nái ekki að uppfylla lagabókstafinn

Kjartan segir að embættið geti ekki sinnt sínu lögbundna hlutverki. „Samkvæmt bókstafnum þá geta menn tekið sér allt að tvær vikur til þess að afgreiða skjöl. En það hefur aldrei verið þannig. Ég held að það vilji enginn taka sér tvær vikur í að þinglýsa skjölum en staðan í dag er sú að það er ekki verið að ná þessum tveimur vikur heldur, embættið er komið í allt að þrjár vikur þannig að embættið er ekki að ná að uppfylla lagabókstafinn,“ segir Kjartan. 

Úrræðin fá og fjárveitingar vanti

Þórólfur segir að embættið geti sinnt sínu hlutverki samkvæmt lögum. Þau geri ráð fyrir að sýslumaður úrskurði hvort skjali verði þinglýst innan tveggja vikna en segi ekkert um hversu langur tími megi líða til að þinglýsa. Hann segir erfitt að spá fyrir um framhaldið en úrræðin séu fá. „Auðvitað væri hægt að ráða fólk ef maður hefði fjárveitingar. Við erum með ansi mikil útgjöld á þessu ári af því að við erum að flytja embættið. Starfsstöðvarnar þrjár verða sameinaðar í eina. Það er aðgerð sem er ætlað að bæta vinnuaðstöðu starfsfólks og til að veita betri þjónustu. Vandinn er sá að breytingarkostnaður af þessu tagi er ekki fjármagnaður sérstaklega. Ráðuneytið gerir ráð fyrir að embættið greiði breytingarkostnað af því sem það hefur fyrir á fjárlögum.“