Bangsadeila Hvít-Rússa og Svía

Deilan hófst fyrir rúmri viku þegar flugmenn á vegum sænskrar auglýsingastofu vörpuðu um 800 leikfangaböngsum til jarðar í Hvíta-Rússlandi. Við bangsana voru fest skilaboð til landsmanna um að berjast fyrir mannréttindum, sem eru fótum troðin í landinu. Alexander Lúkasjenko, forseti, varð æfareiður, kenndi sænsku stjórnvöldum um og rak sendiherra Svía úr landi. Svíar svöruðu í sömu mynt og Carl Bildt, utanríkisráðherra, sagði brottrekstur sænska sendiherrans, Stefans Erikssons, vera vegna þess að hann hefði hitt stjórnarandstæðinga og látið sig varða mannréttindi í landinu. Hvít-Rússar gerðu deiluna þá enn harðari með því að reka alla sænska stjórnarerindreka úr landi. Ekki var að heyra neinn sáttatón á Alexander Lúkasjenko, forseta, á blaðamannafundi í Minsk í dag. Þar var hann harðorður um Eriksson sendiherra, sagði hann hafa starfað ólöglega í Hvíta-Rússlandi og verið í sambandi við fimmtu herdeildarmenn, eins og forsetinn orðaði það.